लकडाउनमा घर बाहिर ननिस्कने भन्दै खाए 'किरिया'

न्यूज ब्यूरो, जनकपुरधाम । सरकारले लगाएको लकडाउन उलंघन गर्नेहरुलाई किरिया (सपथ) खुवाइएको छ ।

विना कुनै कामको लकडाउनलाई उलंघन गरेका आज (मँगलबार) २० जनालाई मोटरसाइकल सहित शस्त्र प्रहरीले नियन्त्रणमा लिएको छ।

जनकपुर, यदुकूहा लगायत विभिन्न ठाउँबाट आवतजावत गर्नेहरूलाई हँसपुर नगरपालिका वडा नं ९ स्थित सोनिगमा शस्त्र बेस क्याम्पले बाटोमा मोटरसाइकल कुदिरहेको मान्छेलाई कारबाही गरिएको हो ।

बिहान ६ देखि १० बजेसम्म लकडाउन उलंघन गर्नेलाई नियन्त्रणमा लिइएको शस्त्र बेस क्याम्प सोनिगमाका प्रमुख प्रहरी निरीक्षक योग बहादुर थापाले बताए ।

अत्यावश्यक काम बिना सडकमा निस्किएका मानिसलाई नियन्त्रणमा लिइएको हो। नियन्त्रणमा लिएकाहरुलाई २ घण्टासम्म सार्वजनिक स्थानमा राखि लकडाउन पालना गर्ने सर्तमा छाडिएको प्रहरीले जनाएको छ।

नियन्त्रणमा परेकाहरुले आफूहरूले लकडाउनको अवधिभर अत्यावश्यक काम बाहेक घरबाट बाहिर ननिस्किने कसम समेत खाएका थिए ।