यस्ता पनि निजी अस्पताल : रेनकोट लगाएर भएपनि रोकेको छैन सेवा

न्यूज ब्यूरो, सिरहा । कोरोना भाइरस (कोभिड–१९) को महामारीले यतिबेला विश्व नै आक्रान्त छ ।

विश्वभर महामारीको रुपमा फैलिएको कोरोना भाइरस नियन्त्रण तथा रोकथामका लागि विश्व लागिपरेको छ । विभिन्न मुलुकमा संक्रमित संख्या बढ्दै गएपछि सरकारी तथा निजी अस्पतालहरुले समेत प्राविधिक क्षमता र श्रोत साधनले भ्याएसम्म काम गर्दै आएको छ ।

तर, नेपालमा भने फरक देखिएको छ । अरुबेला बिरामी तान्न प्रतिस्पर्धा गर्ने निजी अस्पतालहरु यो संकटको बेला सेवा दिन मानिरहेका छैनन् । कोरोनाको लक्षणसँग मिल्ने रुघाखोकीका बिरामी अस्पताल पुग्दा सेवा नपाएको समाचारहरु पनि आउन थालेका छन् ।

कोरोना भाइरस संंक्रमण र त्यसविरुद्ध सरकारले गरेको ‘लकडाउन’ बढ्दै जाँदा निजी अस्पतालहरुमा बिरामी घट्दै गएका छन् । धेरैजसो निजी अस्पतालले बहिरंग सेवा नै बन्द गरे । कतिपय अस्पतालमा ताला झुण्डिएको देख्न सकिन्छ ।

सेवाको नाममा सरकारसँग सुविधा लिने अस्पतालहरु संकटमा भाग्न खोजेको भन्दै आलोचना पनि व्यापक छ । निजी अस्पतालहरु न्यूनतम व्यवसायीक धर्म, काम, कर्तव्य, जिम्मेवारी र दायित्व समेत निर्वाह नगरेको भन्दै आलोचना भइरहेको छ ।

सरकारले अत्यावशकीय पर्शनल प्रोटेक्टीभ इक्युपमेन्ट (पीपीई) लगायतका सुरक्षा सामाग्री उपलब्ध गराउन सकिनरहेको अवस्था छ ।

एकातर्फ, सरकारले स्वास्थ्य संस्थानहरुलाई शंकास्पद विरामीलाई जाँच गर्न चिकित्सकले लगाउने अत्यावशकीय पर्शनल प्रोटेक्टीभ इक्युपमेन्ट (पीपीई) लगायतका सुरक्षा सामाग्री उपलब्ध गराउन सकिनरहेको अवस्था छ । अर्कोतर्फ, निजी अस्पतालहरु आफूहरु सेवा दिन तयार रहेपनि सरकारले सहयोग नगरेको भनेर आफ्नो बचाउ गरिरहेका छन् ।

तर, केही निजी अस्पतालहरु भने सुरक्षा सामाग्री नपाएपनि आफ्ना सेवा रोकेका छैनन् । पीपीई नपाएपछि रेनकोटकै सहारामा भएपनि आफ्ना सेवालाई निरन्तता दिएका छन् । रेनकोट र साधारण मास्क, पञ्जा लगाएर सतर्कतासहित सेवामा खटेका छन् ।

सुरक्षा उपकरणको अभावमा रेनकोट र साधारण मास्क, पञ्जा लगाएर विरामीको उपचार गर्नुपरेको आफ्ना सेवालाई निरन्तरता दिइरहेका लहानस्थित कामना नर्सिङ होमका सञ्चालक रोशन कुशवाहा बताउँछन् । ‘सुरक्षा उपकरण धेरै खोज्यौं, तर भेटेन । सरकारबाट कुनै सहयोग छैन । तर पनि आफ्नो दायित्व बोध गर्दै सेवालाई निरन्तरता दिएका छौं’, उनले थपे, ‘निजी अस्पतालहरु संकटमा भाग्न खोजेको खबरहरु हेर्छु, यस्तो हुनुभएन, भ्याएसम्म गर्नुपर्छ । संकटका बेला सहयोग गर्नुपर्छ ।’

देश लकडाउन भएपछि विरामीको चाप क्रमिक रुपमा घटेपनि दैनिक विभिन्न किसिमका बिरामीहरु आउने गरेको उनले बताए । कोरोना भाइरस संक्रमण र लकडाउनलाई मध्यनजर गर्दै सर्वसाधारणको सहजताको लागि कामना नर्सिङ होमले हेल्पलाइन सेवा पनि सञ्चालनमा राखेको छ ।

यतिबेला उपचारमा खटेका अधिकांश चिकित्सकहरु व्यक्तिगत सुरक्षाको भरपर्दो व्यवस्थाको अभावमै कोभिड–१९ संक्रमणको जोखिम मोलेर काम गरिरहेका छन् ।

सरकारले पीपीई उपलब्ध गराउन नसकेपछि चिकित्सक र अन्य स्वास्थ्यकर्मीहरु रेनकोटलाई व्यक्तिगत सुरक्षा उपकरण (पिपीई) को रूपमा उपयोग गर्दै बिरामीको उपचारमा खटिन बाध्य छन् ।