मधेशमा कोरोना विरुद्ध 'दिपावली'

न्यूज ब्यूरो, जनकपुरधाम । विश्वभर महामारीको रुपमा फैलिएको कोरोना भाइरस (कोभिड १९) को विरुद्धमा आज मधेशका अधिकांश ठाउँमा दिपावली गरिएको छ ।

मधेशका अधिकांश जिल्लामा आइतबार साँझ ९ बजे ९ मिनेटसम्म दीप प्रज्वलन गरिएको हो । जनकपुरमा भने दीप प्रज्वलनसहित पटाखा पनि पड्काइएको छ ।

भारतीय प्रधानमन्त्री नरेन्द्र मोदीले भारतमा मैनवत्ति सहितको दिपावली गर्न र थाली पिट्न आग्रह गरेपछि यसले अन्य देशमा पनि समर्थन पाएको हो । दिपावली गरेपछि अंध्यारोबाट केही मिनट उज्यालो तर्फ जाने तथा सकारात्मक सोंच र त्रासलाई मनोबलमा परिणत गर्न सकिने भन्दै भारतीय प्रम मोदीले दिपावली मनाउन आफ्ना देशका नागरिकलाई अपिल गरेका थिए ।

मादीको अनुरोधलाई समर्थन जनाउँदै छिमेकी नेपालको मधेश भेगका सर्वसाधारणले पनि दिपावली गरेका हुन् । दीप प्रज्वलनले कोरोनासँग लड्ने मनोबल उच्च तथा बलियो बनाउने भन्दै मोदीले यस्तो गर्न अपिल गरेका थिए ।

दीप प्रज्वलन राम्रो भएपनि जनकपुरमा भने युवाहरुले चर्को आवाजका पटाखा पड्काएपछि सामाजिक सञ्जालमा केही टिक्काटिप्पनी समेत भएको देखिएको छ । कोरोनाको त्रासले यत्तिबेला विश्व नै त्रसित छ ।