प्रदेश २ : कोरोना नियन्त्रणका लागि विज्ञ समूहले बुझायो प्रतिवेदन

न्यूज ब्यूरो, जनकपुरधाम । कोरोना महामारी नियन्त्रणका लागि सुझाव दिन प्रदेश २ सरकारद्वारा गठित विज्ञ समूहले आफ्नो प्रतिवेदन सरकारलाई बुझाएको छ ।

विज्ञ समूहका प्रतिनिधिहरुले सरकारलाई बुझाएको प्रतिवेदनमा चिकित्सकीय सामग्रीको प्रयोगदेखि लिएर सामग्रीहरुको उपलब्धता, कोरोना संक्रमितहरुको उपचारमा संलग्न हुने चिकित्सहरुको सुरक्षा देखी प्रोत्साहन भत्ता, विशेष अस्पतालको निर्माण सहितको विषय वस्तुहरु समेटिएको छ ।

विज्ञ समूहले उपचारमा आवश्यक थप सामग्रीहरु, सामान्य विरामीको जाँचमा अपनाइने उपायहरु समेत समेटर प्रतिवेदन बुझाएको छ । विज्ञ समूहको प्रतिवेदन बुभ्mदै मुख्यमन्त्री लालबाबु राउतले प्रतिवेदनमा उल्लेख सुझावहरु सतप्रतिशत कार्यान्वयन गरिने प्रतिवद्धता जनाए ।

विज्ञ समूहले बुझाएको प्रतिवेदनमा पीपीई, मास्क र पञ्जा लगाउने बारे स्पष्ट व्यवस्था गरिएको छ । सर्वसाधारणलाई कपडाको मास्क, सामान्य विरामीको जाँचमा सहभागी हुनेलाई पञ्जा र सर्जिकल मास्क तथा कोरोनाको स्पेशल उपचारमा संलग्न हुनेहरुलाई मात्र एन १५ मास्क तथा पीपीई प्रयोग गर्न सुझाव प्रतिवेदनमा छ ।