सिरहामा अज्ञात समूहले घरमा आगो लगाइदिँदा लाखौंको क्षति

न्यूज ब्यूरो, सिरहा । सिरहामा आगलागी हुँदा लाखौंको क्षति भएको छ ।

सिरहाको कल्याणपुर नगरपालिका ११ कल्याणपुरस्थित एक घरमा गएराति आगलागी हुँदा लाखौं बराबरको क्षति भएको हो । आगलागीमा परेर घरभित्र रहेको एउटा भैँसी र एउटा गोरु जलेर घाइते बनेका छन् ।

भैँसी र गोरुको अवस्था गम्भीर छ । यस्तै, घरभित्रै रहेको एउटा मोटरसाइकल पनि जलेको छ । शुक्रबार विहान करिब डेढ बजेतिर तीन कोठे पक्की घरमा आगलागी भएको प्रहरीले जनाएको छ ।

आगलागीबाट तीन कोठा मध्ये एउटा कोठामा क्षति पुगेको र सोही कोठामा रहेका धनमाल जलेको हो । घरमा आगो लागेको थाहा भएपछि भैंसी र गोरु बाहिर निकालेर पानी छर्केर घरका सदस्यहरुले आगो नियन्त्रणमा लिएका थिए ।

पक्कीको घर भएकाले थप क्षति हुनबाट जोगिएको ईलाका प्रहरी कार्यालय मिर्चैयाका प्रहरी नायव उपरीक्षक (डिएसपी) सन्तु जैसवारले जानकारी दिए । यता, घरधनी बासुदेव ठाकुरले भने कसैले पेट्रोल छर्केर आगो लगाएको दावी गरेका छन् ।

लागलागीको भएको कोठामा आगलागी हुनसक्ने त्यस्तो कुनै बस्तु नै नभएको भन्दै कसैले पेट्रोल छर्केर आगो लगाइदिएको बासुदेवको दावी छ । घरका सबैजना सुतिरहेका बेला पेट्रोल छर्केर अज्ञात समुहले आगो लगाएको देखिएको स्थानीय ब्रजमोहन यादवले पनि बताए ।

घटना सम्बन्धमा थप अनुसन्धान भइरहेको प्रहरीले जनाएको छ ।