काठमाडौंको सडकमा ४ दिनदेखि भोकै रहेका संजिवको उद्धार

न्यूज ब्यूरो, काठमाडौं । विश्वभर महामारीको रुपमा फैलिएको कोरोना भाइरस (कोभिड १९) रोकथामका लागि गरिएको लकडाउनमा काठमाडौंमा अलपत्र परेका एक युवकको उद्धार गरिएको छ ।

लकडाउन भएपछि चक्रपथको सडकमा कठ्यांग्रिदै, भोकै रहेका संजिव कुमारको उद्धार गरिएको हो । थानकोटस्थित एक मिठाई पसलमा काम गर्ने उनी पसल बन्द भएपछि चार दिनदेखि अलपत्र बनेका थिए ।

समाजिक अभियन्ता तथा विवेकशील नेपाली दलकी केन्द्रिय समिति सदस्य रञ्जु दर्शनाले उनको लागि फेसबूक मार्फत् सहयोग गरिदिन आग्रह गरेकी थिइन् । सो पोष्टपछि काठमाडौं बस्दै आएका सप्तरी निवासी शैलेन्द्र यादवले पहल थालेका थिए ।

कोटेश्वरस्थित रहेको आए भ्याली भ्यू एण्ड फैमिली रेस्टुरेन्टले संजिवलाई लकडाउन अवधिभर खान बस्न दिने भएको हो । दर्शनाले होटेल सञ्चालक अरुण यादव र अभियन्ता अमन यादवलाई धन्यवाद ज्ञापन गरेकी छिन् ।