कोरोना त्रास : सिरहा कारागारबाट २१ कैदीबन्दी रिहा

न्यूज ब्यूरो, सिरहा । विश्व महामारीको रुप लिएको कोरोना भाइरस (कोभिड १९) को संक्रमण फैलिन सक्ने सम्भावनालार्य मध्यनजर गर्दै सिरहा कारागारले २१ जनालाई रिहा गरेको छ ।

कारागारमा ठूलो संख्यामा कोचाकोच गरी कैदीबन्दीलाई राख्दा कोरोना भाइरसको जोखिम भएकाले २१ जना कैदीबन्दीलाई रिहा गरेको कारागारले जनाएको छ । जिल्ला अदालत सिरहाको आदेश बमोजिम एक वर्षभन्दा कम समयको कैद सजाय पाएका २१ कैदीबन्दीलाई छाडिएको सिरहा कारागारका जेलर बबिता महतोले जानकारी दिइन् ।

विश्वव्यापी रूपमा फैलिएको कोरोनाको सम्भावित जोखिमका कारण अदालतले एक वर्षभन्दा कम समयको कैद सजाय भएका कैदीबन्दीलाई भुक्तान गर्न बाँकी रहेको समयवापतको रकम तिराएर छाड्न अदालतले आदेश दिएको हो । अदालतको आदेशानुसार ती कैदीबन्दीलाई रकम तिराएर रिहा गरिएको छ ।

कूल १५० जना क्षमता रहेको सिरहा कारागारमा हाल २० महिलासहित ५५१ कैदीबन्दी बस्दै आएका छन् ।