मिथिलाबिहारी नगरपालिकामा ७ बेडको क्वारेन्टाइन निर्माण

न्यूज ब्यूरो, जनकपुरधाम । विश्वभर महामारीको रुपमा फैलिँदै गएको कोरोना भाइरस (कोभिड १९) को जोखिम बढ्दै गएपछि धनुषाको मिथिला बिहारी नगरपालिकामा क्वारेन्टाइन कक्ष निर्माण गरिएको छ ।

कोरोना संक्रमणबाट जोगिन पूर्व तयारी स्वरुप नगरपालिकाले सात बेडको क्वारेन्टाइन कक्ष निर्माण गरेको हो । नगरपालिकास्थित तारापट्टी स्वास्थ्य चौकीमा क्वारेन्टाइन कक्ष निर्माण गरिएको नगरप्रमुख अनिल यादवले जानकारी दिए ।

कुनै व्यक्ति शंकास्पद देखिए तत्कालै क्वारेन्टाइनमा राखेर स्वास्थ्य जाँच गरिने व्यवस्था गरिएको छ । विरामीको चाप र आवश्यकता अनुसार पछि सेवा विस्तार गर्नुपरे विस्तार गरिने मेयर यादवले जनाए ।

यस्तै, आकस्मिक सेवाका लागि २४सै घण्टा मेडिकल टिम पनि तयारी राखिएको छ । आफ्नो नगरका नागरिकको लागि आफू गम्भीरता साथ तयारीमा जुटेको मेयर यादवले बताए । नगरपालिकाले देश बाहिरबाट आएका नगरका नागरिकलाई स्वास्थ्य जाँच गराउन आग्रहसमेत गरेको छ ।

कुनै शंकास्पद व्यक्ति फेला परे तत्कालै सम्बन्धित निकायसँग समन्वय गरेर थप जाँचको लागि पठाइने व्यवस्था मिलाएर राखेको प्रमुख प्रशासकीय अधिकृत शिवेन्द्र मण्डलले बताए ।