कोरोना कोषमा सांसद यादवद्धारा एक महिनाको तलब सहयोग

न्यूज ब्यूरो, काठमाडौं । राष्ट्रिय जनता पार्टी (राजपा) नेपालका अध्यक्षमण्डलका सदस्य एवं प्रतिनिधिसभा सांसद राजकिशोर यादवले सरकारले स्थापना गरेको कोरोना नियन्त्रण कोषमा आफ्नो एक महिनाको तलब दिने घोषणा गरेका छन् ।

नेपाल सरकारले कोरोना भाइरस (कोभिड १९) को संक्रमणलाई नियन्त्रण गर्न स्थापना गरेको कोषमा सांसद यादवले एक महिनाको तलब जम्मा गर्ने घोषणा मंगलबार गरेका हुन् । उनले आफ्नो सांसदबापत सरकारी सेवाबाट प्राप्त भएको एक महिनाको तलब कोषमा जम्मा गर्ने जानकारी दिए ।

नेता यादव सरकारको निर्देशनलाई अवज्ञा नगरी, आतंकित नभई सेल्फ क्वारेन्टाइनमा बस्न सबैलाई आग्रहसमेत गरे । संक्रमणको जोखिम नेपालमा पनि बढेको बताउँदै उनले कोरोना भाइरसको संक्रमणबाट आतंकित नभई सावधानी अपनाउन आम नेपाली नागरिकलाई आग्रह गरेका छन् ।

जनताले चुनेको जनप्रतिनिधि जनताको साथमा रहेको संदेश दिन तीनै तहका जनप्रतिनिधिलाई सहयोग गर्न उनले अपिल गरे । उनी सिरहा निर्वाचन क्षेत्र नम्बर ४ का प्रतिनिधिसभा सांसद हुन् ।