प्रदेश २ मा १८५ बेडको आइसोलेसन वार्ड तयार

न्यूज ब्यूरो, जनकपुरधाम । विश्व महामारीको रुपमा फैलिँदै गएको कोरोना भाइरस (कोभिड १९)को त्रासलाई मध्यनजर गर्दै प्रदेश २ मा १८५ बेडको आइसोलेसन वार्ड तयार गरिएको छ ।

प्रदेशका मुख्य–मुख्य अस्पतालमा आइसोलेसन बेड तयार गरिएको प्रदेश स्वास्थ्य निर्देशनालयले जनाएको छ । सबैभन्दा बढी धनुषाको रमदैयास्थित जानकी मेडिकल शिक्षण अस्पतालमा ६० बेडको आइसोलेसन वार्ड तयार गरिएको छ ।

जानकी मेडिकलकै सिटी अस्पतालमा २० बेडको तयार गरिएको छ भने जनकपुरधामस्थित प्रादेशिक अस्पतालमा ५ बेडको आइसोलेसन तयार गरिएको स्वास्थ्य निर्देशनालयका वरिष्ठ अधिकृत विजय झाले जानकारी दिए ।

उनका अनुसार वीरगञ्जस्थित नेशनल मेडिकल कलेजमा ५० बेडको, नारायणी उपक्षेत्रीय अस्पताल र सप्तरी सदरमुकाम राजविराजस्थित गजेन्द्रनारायण सिंह सगरमाथा अञ्चल अस्पतालमा १० बेडको आइसोलेसन तयार भइसकेको छ ।

सप्तरीको रायपुरस्थित यूनिक अस्पतालमा १० बेडको, सिराहाको लहानस्थित सप्तऋषि अस्पतालमा ५ बेडको आइसोलेसन तयार भएको छ । बारा अस्पतालमा पनि १५ बेडको आइसोलेसन बेड तयार भएको झाले बताए ।

आइसोलेसन बेड तयार भइसकेपछि क्वारेन्टाइन निर्माणको तयारी अघि बढाइएको छ ।