छिमेकी देशसँगका सबै सीमा-नाका बन्द गर्ने सरकारको तयारी

न्यूज ब्यूरो, काठमाडौं । विश्व महामारीको रुप लिएको कोरोना भाइरसबाट बच्न सरकारले छिमेकी देशसँगका सबै नाका बन्द गर्ने तयारी गरेको छ ।

प्रधानमन्त्री तथा मन्त्रिपरिषद् कार्यालय सिंहदरबारमा शुक्रबार साँझ बसेको कोभिड १९ रोकथाम तथा नियन्त्रण उच्चस्तरीय समन्वय समितिको बैठकमा कोरोनाबाट सुरक्षित रहन देशका सबै नाकामा मानिसको आवतजावत बन्द गर्ने विषयमा छलफल भएको हो ।

एक देशबाट अर्काे देशमा आवतजावतले कोरोना संक्रमण फैलिने जोखिम बढेकाले छिमेकी सबै देशका सीमा नाका बन्द गर्ने विषयमा बैठकमा छलफल भएको हो । सरकारले उत्तर र दक्षिणतर्फका सबै सीमा नाका कम्तीमा दुई साता बन्द गर्ने तयारी गरेको छ । आपूर्ति नरोक्ने तर मानिसको आवतजावत बन्द गर्ने तयारी सरकारको छ ।

आज (शनिबार) साँझ ५ बजे कोभिड १९ रोकथाम तथा नियन्त्रण उच्चस्तरीय समन्वय समितिको पुनः बैठक बसेर कहिलेसम्म बन्द गर्ने भन्ने निर्णय गर्ने तयारी रहेको जनाइएको छ ।