प्रभु साहको प्रश्न–“अमरपट्टि घटनाको दोषीलाई कारबाहीमा ढिलाई किन ?”

न्यूज ब्यूरो, रौतहट । नेपाल कम्युनिष्ट पार्टीका नेता एवम् सांसद प्रभु साहले इट्टा उद्योग संचालकको ज्यान मार्ने गरी भएको घटनाको भत्सर्ना गरेका छन् ।

नेकपा प्रदेश नम्बर २ का अध्यक्षसमेत रहेका साहले रौतहटको गरुडा नगरपालिका वडा नम्बर ६, अमरपट्टीस्थित “दाईभाई इट्टा उद्योग” का संचालक एवम नेकपाको रौतहट जिल्ला सदस्य रामबाबु चौधरीका भाइ मुकेश कुमार चौधरीमाथि सांघातिक हमलामा संलग्नलाई कारवाहीको माग गरेका छन् ।

एक विज्ञपति जारी गर्दै नेता साहले भनेका छन्, “रौतहट जिल्लाको गरुडा नगरपालिका वडा नम्बर ६, अमरपट्टीमा रहेको दाईभाई इट्टा उद्योगमा दर्जनौंको संख्यामा रहेको अपराधिक समुहले विहान ९ बजे योजनावद्ध रामबाबु चौधरीज्यूको भाइ मुकेश कुमार चौधरीमाथि सांघातिक आक्रमण गरी गम्भीर घाइते बनाएको छ ।”

नेता साहको विज्ञप्तिमा उल्लेख छ, “यसरी हाम्रा पार्टीका नेतालाई ज्यान मार्ने उद्देश्यले गरिएको यस अपराधिक कार्यको घोर भत्सर्ना गर्दछु । घटनाको निष्पक्ष छानबिन गरी अपराधीहरुलाई कडाभन्दा कडा कानुनी कारवाही गर्न गृह प्रशासनसंग अनुरोध छ।”

आइतबार गरुडा नगरपालिका वडा नम्बर ६ का वडाध्यक्ष अशोक यादवको अगुवाईमा दर्जनौंको संख्यामा गएको समुहहरुले उक्त उद्योगमा आक्रमण गरी मुकेशलाई गम्भीर घाइते बनाएका थिए ।

आक्रमणकारीहरुले इटा भटामा रहेको एक थान जेसीबी, एक थान टिपर, दुई थान ट्र्याक्टर र ३ वटा मोटरसाइकलमा तोडफोड गरेका छन् ।