मधेश प्रदेश र राजधानी जनकपुरमा काँग्रेसले साथ दिनुपर्छ : राज्यमन्त्री यादव

न्यूज ब्यूरो, जनकपुरधाम । प्रदेश नं. २ का भूमि तथा कृषि सहकारी राज्यमन्त्री योगेन्द्र राय यादवले प्रदेशको नाम र स्थायी राजधानीमा काँग्रेसले साथ दिनुपर्ने बताउनुभएको छ ।

प्रदेश नं. २ को नाम मधेश प्रदेश र स्थायी राजधानी जनकपुरधाम न्यायोचित हुने मान्यता रहेको बेला काँग्रेसले समेत यसैमा समर्थन जनाउनुपर्ने आसा राख्नुभएको छ ।

उहाँले मधेशी जनताले चाहेको प्रदेशको नाम मधेश र राजधानी जनकपुरको लागि बिना तुकको कुन बहाना खोजेर जनताका अभिमतलाई गणितीय सँख्या मार्फत विफल पार्न खोजे भविष्यमा त्यस्ता यथास्थितिवादीलाई जनताले दण्डित गर्ने बताउनुभएको छ ।

उहाँले आफ्नो अधिकारिक फेसबुकमा –“नेकपाको चरित्र मधेशका बिरोधमा सदैव रहेका बेला कम्तिमा मधेश–तराईले काँग्रेसलाई बिगतमा प्राण दिएकोले आज जनकपुरमा हुन लागेका नामाकरण र राजधानी सम्बन्धित समाजवादी पार्टी र राजपा गठबन्धनले सारेका एजेन्डालाई काग्रेसले समर्थन गर्दै उदारवादी राजनीति दर्शनको अगुवाई गर्न सक्नु पर्छ ।”– भनेर लेख्नुभएको छ ।

मधेशी शहिदहरुको रगतले सिँचिएको संघीयतामा प्रदेश नं. २ को नाम मधेश नै हुनुपर्ने भनेर जनताहरुले अधिक अभिमत देखाएको छ । आज प्रदेशको नाम र राजधानीको लागि भोटिँग हुँदैछ ।