जनकपुरमा आज 'मटकाफोर' को घमासान हुने

न्यूज ब्यूरो, जनकपुरधाम । प्रत्येक वर्ष होलीमा आयोजना गरिदै आएको मटकाफोर कार्यक्रम यसपाली पनि हुने भएको छ ।

जनकपुरको विभिन्न चोकहरुमा मटकाफोर कार्यक्रमको आयोजना गरिदै आएको छ । सोही क्रममा विगत १२ वर्षदेखि निरन्तर जनकपुरको पुलचोकमा आयोजन हुँदै आएको मटकाफोर कार्यक्रमलाई यसपाली पनि निरन्तरता दिइएको छ ।

जनकपुरधाम उपमहानगरपालिका वडा नं. १ पुलचोक स्थित स्थानीय पूलचोक युवा क्लबको आयोजनामा मटकाफोर कार्यक्रम हुने भएको छ । क्लबका अध्यक्ष राधे यादवका अनुसार पुरस्कारको राशी समेत राखिएको छ ।

मटकाफोर कार्यक्रममा विभिन्न ठाउँका युवाहरुको समूह, क्लबले भाग लिने गरेको छ । विजयी हुनेलाई शिल्ड सहित नगद समेत प्रदान गर्दै आएको छ ।

यसपाली मटकाफोर कार्यक्रममा विजेतालाई शिल्ड सहित पुरस्कार राशी राखिएको क्लबका उपाध्यक्ष किशन साहले जानकारी दिए । साहका अनुसार विगत एक दशकदेखि निरन्तर यो कार्यक्रम चल्दै आएको छ ।

मटकाफोर कार्यक्रमको लागि सम्पूर्ण तयारी पूरा भईसकेको भन्दै दिउँसो १२ बजेदेखि विधिवत रुपमा मटकाफोर कार्यक्रमको शुभारम्भ गरिने छ ।