कला सँस्कृतिले विश्वमा मधेशलाई चिनिएको छ : अर्थमन्त्री यादव

न्यूज ब्यूरो, जनकपुरधाम । प्रदेश नं. २ का आर्थिक मामिला तथा योजना मन्त्री विजय कुमार यादवले मधेशको कला सँस्कृतिले विश्वमा चिनिएको बताउनुभएको छ ।

बुधबार मिथिला लोक कला सँस्कृति महोत्सवमा प्रमुख अतिथियको आसनबाट बोल्दै मन्त्री यादवले मिथिला र मधेशको कला सँस्कृति विश्वमै सबभन्दा फरक रहेको बताउनुभयो । उहाँले यस कला सँस्कृतिलाई जगेर्ना र प्रचार प्रसारको आवश्यकता औल्याउनुभयो ।

मिथिला लोक कला सँस्कृतिका अध्यक्ष सँतोष दासको अध्यक्षता तथा मन्त्री यादवको प्रमुख आतिथ्यमा सम्पन्न भएको उक्त महोत्सवमा मन्त्री यादवले मिथिला मधेशको कला र सँस्कृतिलाई धरोहरको रुपमा बचाउनुपर्ने आवश्यकता रहेको बताउनुभयो । बदलिँदो समाजमा पनि आफ्नो सँस्कृतिलाई जीवन्त राख्न सक्नु नै वीरताका काम भएको उहाँले बताउनुभयो ।

सो कार्यक्रममा कलाकारहरुलाई सम्मान गरिएको थियो । मिथिला मधेशको कला सँस्कृतिमा आफ्नो केही योग्दान दिएका कलाकारहरुलाई त्यो महोत्सवको क्रममा सम्मान गरिएको जनाईएको छ ।

समाजवादी महिला तर्फबाट सिरहाकी सुनिता मोतिरामको विशिष्ट आतिथ्यमा कलाकारहरुलाई सम्मान गरिएको जनाइएको छ । सो महोत्सवमा कला सँस्कृति जगेर्ना क्षेत्रमा काम गर्ने कलाकारहरुको भारी उपस्थिति रहेको थियो ।