जनविद्रोह कुनै ताकतले रोक्न सक्दैन : उपेन्द्र यादव

न्यूज ब्यूरो, जनकपुरधाम । समाजवादी पार्टीका अध्यक्ष उपेन्द्र यादवले मुलुकमा रहेको हालको संविधान र संघीयता दुबै अपांग अर्थात् अपूर्ण रहेको बताएका छन् ।

जनकपुरमा नेपाल बौद्धिक पेशाकर्मी महासंघद्वारा सोमबार आयोजित ‘वर्तमान सन्दर्भमा संविधान संशोधनको अपरिहार्यता’ विषयक कार्यशालामा सम्बोधन गर्दै उनले यस्तो बताएका हुन् । पूर्व उपप्रधानमन्त्री समेत रहेका अध्यक्ष यादवले अपूर्ण रहेको संविधान र संघीयता संरचनालाई संशोधन गरी सर्वस्वीकार्य बनाउनुको विकल्प नरहेको तर्क गरे ।

वर्तमान संविधानले संरचनागत विभेदलाई संस्थागत गरेको भन्दै संविधान संशोधन अपरिहार्य रहेको यादवले धारणा राखे । उनले वर्तमान संविधानको संघीय प्रणाली, निर्वाचन प्रणाली, शासकीय स्वरुप र न्याय प्रणाली समेत अपूर्ण र विरोधाभाषपूर्ण रहेको टिप्पणी गर्दै यथा स्थितिमा मुलुकप्रति सबै जात धर्म क्षेत्र र वर्गले अपनत्व ग्रहण गर्न सक्ने अवस्था नरहेको उल्लेख गरे ।

यादवले हालको संविधान संविधान सभाबाट नभई लेखनदास र कर्मचारीले बनाएको टिप्पनी गरे । विभेदमा परेका समुदायको समस्या समाधान गर्न सरकार गम्भीर नभए जनविद्रोह कुनै ताकतले रोक्न नसक्ने उनले चेतावनी दिए ।

कार्यक्रममा राजपा नेपालका बरिष्ठ उपाध्यक्ष वृषेशचन्द्र लालले संविधान जारी गर्ने संविधान सभाकै ६० प्रतिशत सभासदले संविधान संशोधन गर्नु पर्ने भनि सकेकाले संविधान संशोधनको विकल्प नरहेको बताए । उनके अहिलेको अवस्थामा राजपा र समाजवादी पार्टीलाई एक भएर संविधान संशोधनको लागी अघि बढनु आवश्यक रहेको समेत जिकिर गरे ।

उपाध्यक्ष लालले राजपा र समाजवादी पार्टी विच दूरी बढाउन विभिन्न चलखेल भइरहेकाले शीर्ष नेतृत्वलाई सतर्क रहन आग्रह समेत गरे ।