पुराना पार्टीले मधेशीलाई सत्ताको सिढी मात्र बनाइरहे : डा. सिके राउत

न्यूज ब्यूरो, विराटनगर । जनमत पार्टीका अध्यक्ष डा. सिके राउतले विभिन्न पुराना पार्टी मधेशी जनतालाई सत्ता चढ्ने भर्याङको रुपमा मात्र प्रयोग गर्दै आएको बताएका छन् ।

विराटनगरस्थित स्नातकोत्तर क्याम्पस मैदानमा आइतबार आयोजित विशाल आमसभालाई सम्बोधन गर्दै डा. राउतले यस्तो आरोप लगाएका हुन् । उनले मधेशी जनताको भोटको सहारा पाएर कयौं पार्टी तथा नेता सत्तामा गएपनि मधेशी जनताको हालात यथावत रहेको बताए ।

मधेशी जनता सबै पुराना पार्टी र नेताहरुबाट ठगिएको मात्रै बताउँदै विकल्प दिन जनमत पार्टी आएको बताए । उनले जनमत पार्टी कुनै चोर, फटाहा र भ्रष्टाचारीको पार्टी नभई साधुको पार्टी भएको दावी गरे । मधेशी जनताले ७० साल बढीदेखि नेपाली काँग्रेसलाई जिताएर सरकार बनाउन भोट दिएपनि मधेशीलाई अझ अधिकारबाट बञ्चित राखेको आरोप उनले लगाए ।

उनीहरु मधेशी जनतालाई कमजोर बनाएर शासन गरिरहेको भन्दै अब मधेशी जनता सचेत हुनुपर्ने धारणा राखे । डा. राउतले मधेशीको नाममा राजनीति गर्ने राष्ट्रिय जनता पार्टी (राजपा) नेपाल र समाजवादी पार्टी पनि मधेशी जनतालाई ठग्दै आएको र आफ्नो मोजमस्तीमा लागेको बताए । विभिन्न मुद्दा उठाएर सत्ता चढ्ने सिढीको रुपमा मात्र सिमित बनाएको उनले आरोप लगाए ।

पुराना र डेट एक्सपायर पार्टीले अब केही गर्न नसक्ने भन्दै उनले जनमत पार्टीलाई साथ दिन आग्रह गरे । डा. राउतको भाषणबाट प्रभावित भएर आजै दर्जनौं युवाहरुले जनमत पार्टीमा प्रवेश गरेका छन् ।