अख्तियार नै सरकारको 'मोहरा' : काँग्रेस

न्यूज ब्यूरो, काठमाडौं । नेपाली काँग्रेसले केपी ओली नेतृत्वको सरकारले अख्तियार दुरुपयोग अनुसन्धान आयोगलाई नै दुरुपयोग गरेर मोहरा बनाएको आरोप लगाएको छ ।

बालुवाटार जग्गा घोटाला प्रकरणमा विशेष अदालतमा मुद्दा दायर भएको टिप्पणी गरेको छ । केही जिम्मेमवार व्यक्तिलाई उन्मुक्ति दिएर मुद्दा दायर नगर्नुपर्ने व्यक्तिलाई चाहिँ पूर्वाग्रही ढंगले मुद्दा दायर गर्ने काम भएको काँग्रेसको आरोप छ ।

बिहीबार काँग्रेसले पार्टी कार्यालयमा पत्रकार सम्मेलन गरेर दुई पूर्वप्रधानमन्त्रीहरु माधव कुमार नेपाल र डा बाबुराम भट्टराई तथा नेकपा महासचिव विष्णु पौडेललाई उन्मुक्ति दिएर आफ्ना पार्टी उपसभापति विजय कुमार गच्छदारलाई मात्रै पूर्वाग्रही ढंगले मुद्दा दायर गरेको आरोप लगाएको हो ।

काँग्रेस प्रवक्ता विश्व प्रकाश शर्माले पूर्वाग्रही ढंगले मुद्दा दायर भएपनि गच्छदारले कानुनी र राजनीतिक रुपमा सामना गर्ने बताए । विधि र प्रक्रिया मिचेर मुद्दा दायर भएपनि काँग्रेस विधि र प्रक्रियामा विश्वास राख्ने पार्टी भएकाले सोही अनुसार अघि बढ्ने स्पष्ट पारे ।

उनले पूर्वप्रधानमन्त्रीद्वय नेपाल र भट्टराईको नाम समेत बालु्वाटार जग्गा घोटालामा चर्चामा आएपनि किन मुद्दा चलाइएन भन्दै आक्रोश पोखे । ‘प्रधानमन्त्रीहरु चोखो हुँदा त्यही क्याबिनेटका मन्त्रीचाहिँ कसरी अंशियार हुने ?’ प्रवक्ता शर्माको प्रश्न थियो ।

उनले नेकपा महासचिव विष्णु पौडेलका छोरा नवीनको नाममा रहेको जग्गा फिर्ता दिने सर्तमा मुद्दा नचलाइएको भनिनु आश्चर्यजनक भएको बताए । जग्गा फिर्ता गरेर मुद्दा नचलाउने भन्ने विश्वमै नभएको नजिर नेपालमा स्थापना भएको पनि प्रवक्ता शर्माले बताए ।