धनुषाको ढल्केवर आँखा अस्पतालले मोतियाविन्दुको निःशुल्क अपरेशन गर्ने

न्यूज ब्यूरो, जनकपुरधाम । धनुषामा रेयुकाई एईको आयोजनामा निःशुल्क आँखा शिविर सम्पन्न भएको छ ।

धनुषाको धनुषाधाम नगरपालिका वडा नं. ७ धारापानी स्थिति रेयुकाई एई मासुनागा आँखा अस्पताल ढल्केवर र यज्ञभूमि बहुमुखी क्याम्पसको सँयुक्त आयोजनामा निःशुल्क आँखा शिविर सम्पन्न भएको हो ।

गरिब, विपन्न, अल्पसँख्यक समुदायहरुको स्वास्थ्यमा पहुँच बनाउने हेतु उनीहरुलाई मध्यनजर गर्दै निःशुल्क आँखा शिविर गरिएको हो । बुधबार आयोजना गरिएको एक दिने निःशुल्क आँखा परीक्षण शिविरमा सय बढी विरामीहरुले लाभ लिएका छन् ।

सो शिविरमा धनुषाको पुष्पवलपुर, भिमान, किसानपुर, ढल्केवर, वीरेन्द्रबजार लगायतका स्थानीयहरुले लाभ लिएका छन् । शिविरमा १ सय ७६ जनाले निःशुल्क रुपमा आँखा परिक्षण गराएको हो । सो क्रममा ३५ जनामा मोतियाविन्दु भेटाएको रेयुकाई आँखा अस्पताल ढल्केवरका दृष्टि विशेषज्ञ डा. सुवास यादवले जानकारी दिनुभयो ।

शिविरको क्रममा ५० जनामा आँखाको दृष्टि कमजोर भएको विरामी फेला परेको उहाँले जानकारी दिनुभयो । निःशुल्क शिविरको क्रममा फेला परेको ३५ जना मोतियाविन्दुको विरामीलाई रेयुकाई आँखा अस्पताल ढल्केवरमा निःशुल्क अपरेशन गर्ने डा. यादवले जानकारी दिनुभयो ।

स्थानीय स्तरमै आँखा सम्बन्धि शिविर गएपछि स्थानीयहरु उत्साहित देखिएका थिए । स्थानीयहरुले आँखा शिविरको लागि चिकित्सकहरुको सराहना गरेको थियो । ४ जना चिकित्सकहरुको टिममा २ जना डाक्टर तथा २ जना सहयोगीले शिविर सँचालन गरेको थियो ।