प्रदेश २ मा न सरकार फेरिन्छ, न मन्त्री : मुख्यमन्त्री राउत

न्यूज ब्यूरो, जनकपुरधाम । प्रदेश २ का मुख्यमन्त्री लालबाबु राउतले मधेश आन्दोलनको म्यान्डेट अनुरुप गठन भएको समाजवादी र राजपा गठबन्धनको सरकार ५ वर्षसम्म चल्ने दावी गरेका छन् ।

नेपाल इन्जिनियर्स एशोसिएशन प्रदेश २ को प्रथम वार्षिकोत्सव कार्यक्रमलाई सम्बोधन गर्दै मुख्यमन्त्री राउतले हल्लाको पछाडी नलाग्न आग्रह गरे । उनले यो सरकार मधेश जनताको म्यान्डेटले बनेकाले पाँच वर्षसम्म चल्ने दावी गरे ।

संघीयतालाई नरुचाउने प्रतिक्रियावादी शक्तिहरु समाजवादी र राजपाबीच फुट डालेर संघीयतालाई नै सखाप पार्ने षड्यन्त्र गरिरहेको भन्दै मुख्यमन्त्री राउतले दुबै दलका शीर्ष नेताहरुले चयन गरेको मन्त्री फेर्ने काम नहुने पनि स्पष्ट पारे । यो सरकार सिक्ने क्रममा रहेको र कर्मचारी तन्त्रबाट पूर्ण सहयोग पाउन नसकेको अवस्थामा केही समस्याहरु आएको स्वीकार गर्दै उनले मुलुकको संघीयता जोगाउने अभिभारा प्रदेश २ माथि नै रहेकाले आफुहरु झिना मसिना कुरामा नअल्झिने समेत स्पष्ट पारे ।

अर्को प्रसंगमा मुख्यमन्त्री राउतले गत आर्थिक वर्षको भुक्तानी गर्न कानून समस्याहरु आएकोले ढिलो हुन गए पनि अबको केही दिनमै नियमावली बनाएर भुक्तानी दिने र्तैयारी शुरु भइसकेको स्पष्ट पारे । नेपाल इन्जिनियर्स एशोसिएशन प्रदेश २ का अध्यक्ष नन्द किशोरको अध्यक्षतामा भएको उक्त कार्यक्रममा मुख्यमन्त्री राउतले इन्जिनियर्सहरुको सेवा सुविधाको लागि प्रदेश सरकार प्रतिवद्ध रहनेसमेत बताए ।