सिरहामा शिक्षकको कुटाईबाट विद्यार्थीको हात भाँच्चियो

न्यूज ब्यूरो, सिरहा । सिरहाको मिर्चैयास्थित स्वस्तिक पाठशालामा शिक्षकको कुटाईबाट एक विद्यार्थीको हात भाँचिएको छ ।

गृहकार्य नगरेको भन्दै कुट्दा कक्षा ६ मा अध्ययनरत सिरहा नगरपालिका २ का ऋतिक यादवको हात भाँचिएको हो । होस्टेलमा बसेर अध्ययन गर्दै आएका ऋतिकलाई नेपाली बिषयका शिक्षक तारा कार्कीले गृहकार्य नगरेको भन्दै लट्टीले कुट्दा उनको हात भाँचिएको बालकका काका देवकुमार यादवले बताए ।

नेपाली बिषयमा घोकेर आउन भनेको र घोकेर आउन नसक्दा आफूलाई शिक्षक कार्कीले कुटपिट गरेको बालक ऋतिकले बताए । ऋतिक पछिल्लो ६ बर्षदेखि यहीं विद्यालयको होस्टेलमा रहेर पढ्दै आएका छन् । उनको हात भाँचिएपछि अभिभावकले उपचार गराउँदै आइतबार नै घर लगेका छन् ।

नेपाल पत्रकार महासंघका केन्द्रीय सदस्यसमेत रहेका देवकुमार यादवले बालबालिकालाई गृहकार्य नगरेको भन्दै कुटपिट गर्नु अपराध भएको बताए । उनले भने, ‘हातै भाँच्चिने गरी कुटपिट गरिएको छ । गृहकार्य नगरेको भन्दै बालबालिकालाई भौतिक सजाय दिन मिल्दैन ।’ उनले कुटपिटमा संलग्न शिक्षकलाई कारबाही गर्नसमेत माग गरे ।

सरकारले बालमैत्री वातावरणमा अध्ययन गराउन निर्देशिका बनाएपनि कतिपय विद्यालयमा बालबालिकालाई अझै पनि कुटेरै पढाउने प्रवृत्ति कायमै देखिएको छ ।