राजपासँगको सहकार्य राम्रो सुरुवात भएको छ : ईश्वर पोखरेल

न्यूज ब्यूरो, महोत्तरी । उपप्रधानमन्त्री ईश्वर पोखरेलले नेपाल कम्युनिष्ट पार्टी (नेकपा) र राष्ट्रिय जनता पार्टी (राजपा) नेपालबीचको सहकार्य राम्रो सुरुवात भएको बताएका छन् ।

नेकपा महोत्तरीद्वारा बर्दिवासमा आयोजित कार्यक्रममा प्रदेश २ बाट राष्ट्रियसभामा निर्वाचित प्रतिनिधिलाई बधाई ज्ञापन गर्दै उनले राजपासँगको सहकार्यले निर्वाचनमा राम्रो परिणाम आएको बताएका हुन् । कार्यक्रममा नेकपाका प्रदेश नं २ का इञ्चार्ज एवम् प्रदेशसभा २ मा विपक्षी दलका नेता सत्यनारायण मण्डल, पार्टीका प्रदेश २ का सहइञ्चार्ज विश्वनाथ साहसहितका नेताहरुले नवनिर्वाचित राष्ट्रियसभा सदस्यलाई बधाइ ज्ञापन गरे ।

नेकपाबाट राष्ट्रियसभामा निर्वाचित तुलसा दाहाल र राधेश्याम पासवानले जनअधिकार र जनचासोका विषयमा केन्द्रित रहने प्रतिबद्धता जनाए ।