मधेशमा नेकपा र राजपाको जीत, समाजवादी र काँग्रेस शून्य

न्यूज ब्यूरो, जनकपुरधाम । आज (विहिबार) सम्पन्न भएको राष्ट्रिय सभाको निर्वाचनमा प्रदेश नं. २ (मधेशबाट) नेपाल कम्यूनिष्ट पार्टी (नेकपा) र राष्ट्रिय जनता पार्टी (राजपा) नेपालको गठबन्धनले शतप्रतिशत बाजी मारेको छ ।

आज विहान १० बजेदेखि विधिवत रुपमा सुरु भएको राष्ट्रिय सभाको निर्वाचनको मतदान अपरान्ह ४ बजेसम्म चलेको थियो । ४ बजे मतदान समाप्त भएलगत्तै केही बेरमै मतगणना सुरु भएको थियो ।

प्रदेश नं. २ को ८ वटै जिल्लाबाट सबै स्थानीय तहका मेयर, उपमेयर र प्रमुख, उपप्रमुख तथा प्रदेश नं. २ का साँसदहरुले मतदान गरेका थिए ।

निर्वाचनको मत परिणाम अनुसार नेकपाको तर्फबाट खडा गरिएको महिला सहितको दुवै उम्मेदवार विजयी भएको हो भने राजपाको समेत दुवै उम्मेदवार विजयी भएको हो । महिला तर्फबाट नेकपाकी तुलसा दाहाल, दलितबाट राधेश्याम पासवान) विजयी भएका हुन् ।

यता, राजपाको तर्फबाट अल्पसँख्यकबाट खडा गरिएको शेखर कुमार सिँह र अन्य समूहबाट मृगेन्द्र सिँह (यादव विजयी भएका हुन् । ४ को चारै सिट नेकपा–राजपाले जीतेका छन् ।

नेपाली काँग्रेस र समाजवादी पार्टी नेपालको गठबन्धनका तर्फबाट महिला तर्फ नगिना यादव, अल्पसँख्कबाट भोला पञ्जियार तथा अन्यबाट अनिरुद्ध प्रसाद सिँह (यादव) लडेका थिए ।

प्रदेश नं. २ बाट राष्ट्रियसभा निर्वाचनका लागि १ सय ७ जना प्रदेश सांसद र १ सय ३६ जना स्थानीय तहका प्रमुख तथा उपप्रमुख गरी जम्मा ३ सय ७९ मतदाता रहेकोमा लगभग सबै जनप्रतिनीधिहरुले मतदान गरेका थिए ।

प्रदेश २ मा राष्ट्रिय सभाको चार सदस्यका लागि भएको निर्वाचनमा ८ जनाले उम्मेदवारी दिएका थिए । निर्वाचनमा नेकपासँग राजपा र कांग्रेससँग समाजवादीले छुट्टाछुट्टै गठबन्धन गरी उम्मेदवारी दिएका थिए ।