पर्यावरण शहिद दिलीपको १३ औं पुण्यतिथिमा १००० विरुवा रोपियो

न्यूज ब्यूरो, जनकपुरधाम । पर्यावरणको संरक्षणको क्रममा शहादत दिएको भन्दै पर्यावरण अभियानीहरुको पहलमा दिलीप महतोको १३ औं पूण्य तिथिमा १००० वृक्ष रोपिएको छ ।

पर्यावरण संरक्षणको क्रममा शाहदत प्राप्त प्रथम पर्यावरण शहिद ओम प्रकाश (दिलीप) महतोको १३ औं पूण्य तिथिको अवसरमा स्वः ओम प्रकाश महतो पर्यावरण संरक्षण प्रतिष्ठान र औरहीबाबा सा.व. उ.स. को संयुक्त आयोजनामा १००० वृक्ष रोपिएको हो ।

दिलीपलाई पहिले फलामे लिभरले कोंखामा घोंचेर सुताए, अनि माथिबाट ट्रिपर चलाए !

मँगलबार आयोजित श्रद्धाञ्जली सभामा निम, अमला, महोगनी, सतिसाल, मैंगोस्टिन, गोल्डमोहर, कलंकी, तेजपात र कपुर जातका गरी १००० विरुवा औरही खोलाको सिरानमा औरही बाबा मन्दिर छेउछाउ रोपण गरिएको पर्यावरण एवम् सफाई अभियानी तथा जनकपुरधाम वन प्राबिधिक समाजका महासचिव सुरेश शर्माले जानकारी दिनुभयो ।

स्वः दिलिप यादवका बुवा राम जीवन महतोको अध्यक्षता तथा गणतन्त्र नेपालका प्रथम राष्ट्रपति डा. रामवरण यादवको प्रमुख आतिथ्यता सम्पन्न भएको १३ औं पूण्यतिथिको क्रममा विभिन्न ठाउँका पर्यावरण अभियानी, सरसफाई अभियानीको सक्रियतामा पर्यावरण जोगाउने हेतु दिलिपको हत्या भएकै ठाउँमा १ हजार वृक्ष रोपन गरिएको हो ।

वृक्षारोपण कार्यक्रममा पूर्व मन्त्री महेन्द्र यादव, प्रदेश सभा सदस्य राम आशिष यादव, जिल्ला समन्वय समिति धनुषाका सभापति रामदेव बनरैत, उप–सभापति दिपक झा, मिथिला नगरपालिकाकी उपमेयर, , डिएफओ अशोक कुमार झा, FECOFUN का सोम प्रसाद शर्मालगायतका व्यक्तित्वहरु सहित स्थानीयहरूको उपस्थिति रहेको थियो ।