रुपा र धीरेन्द्रलाई दोहा कतारमा सम्मान

न्यूज ब्यूरो, दोहा । रेडियो कार्यक्रम सँचालक एवम् साहित्यकार धीरेन्द्र प्रेमर्शी र उनकी श्रीमति रुपा झालाई दोहा कत्तारमा सम्मान गरिएको छ ।

हेल्प मधेशी दोहा कतारको आयोजनामा एक समारोहबीच दुवै जनालाई सम्मान गरिएको हो । हेल्पमधेशी दोहा कतार र साँझक चौपाडी दोहा कतारको सँयुक्त आयोजनामा गत शुक्राबार दुवै जनालाई सम्मान गरिएको हो । विद्यापति स्मृति पर्व, परदेशी आखरको नयाँ अंकको लोकार्पण सहित उहाँहरुलाई सम्मान गरिएको हो ।

कतारको समयको शुक्रबार राती ८ बजेतर्फ त्यहाँ स्थित रहेको ग्राण्ड मलमा हेल्प मधेशी दोहा कतारमा अध्यक्ष राम कल्याण महतोको अध्यक्षता तथा प्रेमर्शी र उनकी श्रीमति झाको विशेष प्रमुख तथा विशिष्ट आतिथ्यमा सम्पन्न भएको समारोहमा दुवै जनालाई सम्मान गरिएको हो ।

सो कार्यक्रमको क्रममा विशिष्ट अतिथिको आसनबाट बोल्दै रुपा झाले विदेशमा बसेर पनि मिनी मिथिला बनाएको भन्दै सहभागीहरुलाई प्रशंसा गर्नुभयो । सो क्रममा धिरेन्द्र प्रेमर्शीद्धारा लिखित मैथिली भाषाको गीत “प्रियतम हमर कमौवा यौ, कतेक कमेबै ढौवा यौ” बोलको गीत गाएपछि उपस्थित नेपाली युवकहरु भावुक भएका थिए ।

सोही क्रममा धिरेन्द्र प्रेमर्शीले “एतेवे दुवा मँगैछी अल्लाह मिथिले मे तु जनम दिह” बोलको गीत गाएर उपस्थित पदाधिकारीहरुलाई झुमाउनुभयो । सोही क्रममा अतिथिको रुपमा हेल्प मधेशीका सँस्थापक सदस्य गोविन्द झा र वर्तमान सल्लाहकार तथा निवर्तमान अध्यक्ष पवन ठाकुरले समेत मिथिला मैथिल र परदेशीको जीवन बारे चर्चा गर्नुभएको थियो ।

कार्यक्रमको पहिलो चरणमा मधेशी शहिदहरुप्रति मौन धारणका साथै सम्मान प्रकट गरिएको थियो । सोही कार्यक्रमको दोस्रो चरणमा हेल्प मधेशीको तर्फबाट शीवकुमार महतो,राम कल्याण महतो,गोबिन्द झा र पवन ठाकुरद्धारा अतिथिहरुलाई दोसल्ला ओढाएर सम्मान समेत गरिएको थियो । साथै, साँझक चौपाड़िको तर्फबाट कवि वीरेन्द्र कुमार सिंह “कुसबाहा” असरफ राइन,राम अधीन “सम्भव” र दिनेश कुमारद्वारा समेत दुवै जनालाई दोसल्ला ओढाएर सम्मानीत गरिएको थियो ।

यसका साथै, धनुषा सेवा समाज दोहा–कतारको तर्फबाट देबेन्द्र ठाकुर र प्रवासी मिथिला समाज कल्याण दोहा कतार तर्फबाट कवि–समाजसेवी रवीन्द्र उदासी मालीजीद्वारा समेत सम्मानित गरिएको हो । हेल्प मधेशीका इन्जिनियरिङ एशोसिएसन लगायत अन्य संघसँस्थाहरुसँग आवद्ध पदाधिकारीहरुले पालैपाले सम्मान गरेको थियो । इन्जिनियर वीरेन्द्र कुमार साहसहित सँस्थाका विन्देश्वर ठाकुरले मिथिला र मैथिली तथा मधेशको वर्तमान परिस्थितिबारे परिचय गराउनुभएको थियो ।