धनुषाको रघुनाथपुरमै बर्थिङ्ग सेन्टर, स्थानीयमा खुसियाली

न्यूज ब्यूरो, जनकपुरधाम । धनुषाको सबैला नगरपालिका वडा नं. १२ रघुनाथपुर टोलमै बर्थिङग सेन्टरको भवन उदघाटन भएपछि स्थानीयहरुमा हर्ष छाएको छ । प्रसूतिको बेला जतिबेला पनि जनकपुर वा अन्य शहर लैजानुपर्ने बाध्यतालाई चिर्दै बर्थिङग सेन्टर बनेपछि स्थानीयवासीहरुमा आसा पलाएको छ ।

गणतन्त्रका प्रणेता रामराजा प्रसाद सिंहको सम्झनामा धनुषाको रघुनाथपुरमा करिव ४५ लाखको लागतमा स्वास्थ्य चौकी तथा बर्थिङ्ग सेन्टर भवनको समुदघाटन गरिएको हो । रघुनाथपुरको उतिमपुर टोल स्थित करिव ३ कठ्ठा जमिनमा रहेको स्वास्थ्य चौकी प्राङ्गणमा प्रदेशसभा सदस्य डा। मनोज कुमार सिंहको संसदिय विकास कोषवाट ४५ लाखको लागतमा बर्थिङ्ग सेन्टरको दुइ तल्ले भवनको समुदघाटन गरिएको छ ।

प्रदेशसभा सदस्य डा. सिंह गणतन्त्रवादी नेता स्व। सिंहका जेष्ठ सुपुत्र हुन । रघुनाथपुरमा आयोजित भवन समुदघाटन समारोहका प्रमुख अतिथि प्रदेशसभा सदस्य किशोरी साह कमल, विशिष्ठ अतिथि प्रदेशसभा सदस्य डा। मनोज कुमार सिंह र सवैला नगरपालिकाका प्रमुख विजय शंकर साहले सामुहिक रुपमा भवनको समुदघाटन गरेका छन् ।

वडा अध्यक्ष तथा स्वास्थ्यचौकी व्यवस्थापन समितिका अध्यक्ष प्रदिप महतोको अध्यक्षतामा भएको सो समारोहमा स्वास्थ्य चौकीका लागि जग्गा दान गर्ने जग्गा दाता स्थानिय दिपशरण यादव, युवा अभियन्ता बिनोद कुमार धामी सहित अतिथिहरुलाई समेत सम्मान गरिएको छ । भवन समुदघाटन संगै स्थानियले गाँउमै स्वास्थ्य र प्रसुती सेवा पाउने भएपछि खुसी भएका छन् । समारोहमा स्थानियवासीहरुको उल्लेख्य सहभागिता थियो ।