विद्यार्थी जनमत संघ सिरहाको अध्यक्षमा सहनी

न्यूज ब्यूरो, सिरहा । डा. सिके राउत नेतृत्वको जनमत पार्टीको भातृ संगठन विद्यार्थी जनमत संघको सिरहा जिल्ला तदर्थ कार्यसमिति गठन गरिएको छ ।

सिरहाको गोलबजारस्थित उद्योग वाणिज्य संघको सभाहलमा शुक्रबार आयोजित एक कार्यक्रमबीच अरविन्द सहनीको नेतृत्वमा जिल्ला कार्यसमिति गठन गरिएको हो । यस्तै, जिल्ला उपाध्यक्षमा कुशेश्वर ठाकुर र सचिवमा रामअधिन पासवान चयन भएका छन् ।

जनमत पार्टीका केन्द्रीय नेता तथा जिल्ला संयोजक राजकुमार त्यागी तथा विद्यार्थी जनमत संघका केन्द्रीय अध्यक्ष पोषण यादवसहितको उपस्थितिमा जिल्ला कार्यसमिति गठन गरिएको हो । मधेशको मुहार फेर्ने एजेन्डासहित अघि बढेको जनमत पार्टीको भातृ संगठन विद्यार्थी जनमत संघले अब मधेशका जिल्ला जिल्लामा शिक्षा क्षेत्रमा सुधारको कार्य गर्ने योजना बनाएको छ ।

तत्कालिन स्वतन्त्र मधेश गठबन्धनका संयोजक डा. राउत मूलधारको राजनीतिमा आएसँगै बनाएको जनमत पार्टीले संगठन निर्माण तथा विस्तार कार्यलाई तीव्रता दिएको छ ।