सिरहाबाट १९ लाख घुस रकमसहित तीन इञ्जिनियर फन्दामा

न्यूज ब्यूरो, सिरहा । सिरहा लहानका सडक डिभिजन कार्यालय प्रमुख सिभिल इञ्जिनियर विनोद साहसहित तीनजना झण्डै १९ लाख घुस रकमसहित पक्राउ परेका छन् ।

अख्तियार दुरुपयोग अनुसन्धान आयोग बर्दिबासबाट खटिएको टोलीले उनीहरु तीनै जनालाई शुक्रबार साँझ कार्यालयबाट नै पक्राउ गरेको हो । पक्राउ पर्नेमा विनोदसहित इञ्जिनियर नवीन साह र ओभरसियर विरेन्द्र साह रहेका छन् ।

दुईजनालाई १५ लाख ९६ हजार घुस रकमसहित पक्राउ गरिएको अख्तियारले जनाएको छ । रुपनीदेखि राजविराज हुँदै कुनौलीसम्मको सडकमा निर्माण सम्पन्न गरेपछि बाँकी भुक्तानीका बेला ठेकेदारसँग घुस मागेका उनीहरुलाई पक्राउ गरिएको अख्तियारले जनाएको हो ।

पक्राउ परेका तीनै जनालाई थप अनुसन्धानका लागि बर्दिबास लगिएको छ ।