एनप्याब्सन सिरहा अधिवेशन : 'निजी विद्यालयले मनोमानी शुल्क लिए खबर गर्नुस्'

न्यूज ब्यूरो, सिरहा । निजी तथा आवासीय विद्यालयहरुको छाता संगठन नेशनल प्याब्सन सिरहाको आठौं अधिवेशन सम्पन्न भएको छ ।

सिरहाको मिर्चैयास्थित सागरमाथा उमाविको सभाहलमा शनिबार एनप्याब्सन सिरहाको जिल्ला अधिवेशन सम्पन्न भएको हो । कार्यक्रममा प्रमुख अतिथिका रुपमा सहभागी नेशनल प्याब्सनका केन्द्रीय अध्यक्ष ऋतुराज सापकोटाले सरकारले सामुदायिक विद्यालयको अवस्था ठीक नपारेर निजी विद्यालयमाथि नजर गडाउन नमिल्ने बताएका छन् ।

मुलुकको शिक्षाको विस्तार र सर्वसुलभ बनाउन सरकारले निजी विद्यालयहरुको संगठनलाई पनि विश्वासमा लिएर अघि बढ्नुपर्ने उनले बताए । निजी विद्यालयले गुणस्तरीय शिक्षा सर्वसुलभ बनाउन निर्वाह गरेको भूमिकालाई राज्यले यथोचित कदर गर्नुपर्नेमा उनले जोड दिए ।

निजी विद्यालयले शिक्षा क्षेत्रमा पुर्याएको योगदानलाई राज्यले नकारात्मक रूपमा नलिन अध्यक्ष सापकोटाले आग्रह गरे । सरकारले निजी विद्यालयमाथि जबर्जस्ती शिक्षा नीति थुपार्न खोजे मान्य नहुने उनले बताए । उनले शिक्षासम्बन्धी नीति तर्जुमा गर्दा निजी विद्यालयको साथ र सहयोग लिनुपर्नेमा खाँचो औल्याए । निजी विद्यालयले मनोमानी शुल्क असुलिरहेको भन्ने पत्रकारको प्रश्नमा उनले त्यस्तो भेटिए संगठनलाई जानकारी दिन अनुरोधसमेत गरे ।

यस्तै, एनप्याब्सनका केन्द्रीय महासचिव सुभाष न्यौपानेले निजी विद्यालयलाई नाफामुखी भएको भन्ने राज्यको दृष्टिकोण बदल्नुपर्ने खाँचोसँगै निजी विद्यालयहरूले आफूभित्र रहेको कमीकमजोरी पनि सच्याउन तयार रहेको प्रतिवद्धता जनाए । अधिवेशन समारोहमा नेशनल प्याब्सन सिरहाका अध्यक्ष प्रदीप तिवारीले पनि सरकारले निजी विद्यालयले शिक्षा क्षेत्रमा पुर्याएको योगदानको कदर गर्नुपर्ने धारणा राखे । उनले मुलुकको शैक्षिक विकासको लागि सरकार र निजी विद्यालयहरुबीच सहकार्य र साझेदारी आवश्यक रहेको बताए ।

त्यसैगरी, सिरहा निर्वाचन क्षेत्र ४ ‘क’ का प्रदेश सांसद दिलीप कुमार साहले ऐन, नियमको परिधिभित्र रहेर निजी विद्यालयले विद्यार्थीहरूसँग शुल्क लिनुपर्ने र व्यवस्थापन गर्नुपर्ने बताए । उनले नेपालको शिक्षालाई परिणाममुखी बनाउन आवश्यक रहेको धारणा राखे । नेपालको शिक्षालाई जनमुखी बनाउँदै प्रतिफल प्राप्त गर्नसक्ने उनले बताए ।

अधिवेशनले आउँदो तीन वर्षका लागि नयाँ नेतृत्व चयन गर्नेछ । नयाँ नेतृत्वको टुंगो आजै लगाउने गरी छलफल जारी रहेको जनाइएको छ ।