शंकास्पद वस्तु 'फोहोरको थैला' फेला परेपछि...

न्यूज ब्यूरो, धनुषा । जताततै बम राखिएको आशंकापछि धनुषाको पर्वतामा विद्यालयमा राखिएको शंकास्पद वस्तु फोहोरमैलाको थैला रहेको नेपाली सेनाले जनाएको छ ।

आज विहान करिब ९ः३० बजेको समयमा विद्यालयको झ्यालमा सेतो प्लास्टिकमा शंकास्पद वस्तु देखेपछि विद्यार्थीहरुमा भागमभाग मच्चेको थियो भने समयमै पुगेका नेपाल प्रहरीले त्यस क्षेत्रलाई आफ्नो नियन्त्रणमा लिएका थिए । करिब १२ बजेतर्फ पुगेको नेपाली सेनाको बम डिस्पोजल टोलीले त्यस शंकास्पद वस्तुलाई फोहोर मैलाको थैला मात्र रहेको बताएका छन् ।

स्थानीयहरुमा त्रास फैलाउनको लागि सुनुयोजित तरिकाले विद्यालयको लेखाशाखको झ्यालमा फोहोरको थैला राखेको जनाइएको छ । विद्यार्थीहरुमा समेत त्रास फैलाउनकै लागि सुनुयोजित ढँगले त्यो थैला राखेको बताईएको छ । नेपाली सेनाका क्याप्टेन ज्ञानेन्द्र जैसीको नेतृत्वमा गएको बम डिस्पोजल टोलीले त्यसलाई सुनुयोजित तबरले राखिएको बताउनुभयो । उहाँले भन्नुभयो,- "फोहोरको थैला विद्यालयमा किन कोही राख्छन् र ? त्यो पनि लेखा शाखाकै झ्यालमै गएर ? त्यो त जहाँ पनि फाल्न सक्छ नी ? यो त्रास फैलाउने योजना मात्र थियो ।"

नेपाली सेनाको बम डिस्पोजल टोलीले फोहोरको थैला बताएपछि त्यहाँको अवस्था विस्तारै समान्य हुँदै गएपनि त्रास भने अझै कायमै रहेको छ । गत शुक्रबार धनुषाको महेन्द्रनगरमा ३ जनाको ज्यान जाने गरी भएको बम विस्फोटपछि धनुषावासीमा त्रास र शंका उत्पन्न भएको छ ।