धनुषा : स्वास्थ्य चौकीमा छैन सिटामोल, मोबाईल चलाएर दिन काट्दै अनमी

न्यूज ब्यूरो, धनुषा । धनुषाको एक स्वास्थ्य चौकीमा औषधि अभाब भएको छ । निःशुल्क पाउनुपर्ने औषधि उपचारबाट स्थानीय बासिन्दाहारु वञ्चित हुनुपरेको छ ।

धनुषाको हँसपुर नगरपालिका वडा नम्बर ९ स्थित बालगंगा चौकमा रहेको स्वास्थ्य चौकी सोनिगमा औषधि लिन गएका बिरामीहरूलाई रित्तै हात फर्किन बाध्य भएका छन् । उक्त स्वास्थ्य चौकीमा ७ जना चिकित्सकको दरबन्दी रहेता पनि अहिले ३ जना (अनमी) मात्रै कार्यरत छन् ।

न्यूज ब्यूरो टिम स्वास्थ्य चौकी पुग्दा त्यहाँ एक जना अनमी मोबाइल चलाउदै कुर्सीमा बसिरहेका थिइन् भने २ खोप लगाउन फिल्डमा गएको अस्पतालमा उपस्थित अनमीले बताइन् । एक स्थानीयका अनुसार औषधि अभाब हुँदा बिरामीहरुले निजी स्वास्थ्य संस्थाहरुमा किनेर खानु पर्ने बाध्यता छ ।

बिरामी भएर स्वास्थ्य चौकी आउँदा औषधि छैन भनेर स्वास्थ्यकर्मीले खाली हात पठाउने गर्छन् । बिरामीले औषधि किन छैन भनेर प्रश्न गर्दा औषधि ल्याउने काम हाम्रो होईन भनेर पंछिन्छन् । यस स्वास्थ्य चौकीमा ३२ प्रकारका औषधि हुनुपर्छ, तर अहिले दैनिक रुपमा चाहिने आईरन चक्की, ब्रोफिन जस्ता औषधि उपलब्ध गराउन सकिरहेको छैन ।

‘यो अस्पतालको अवस्था पहिला पनि यस्तै थियो, स्थानीय सरकार बनेको २ वर्ष बितिसक्दा पनि अवस्था उस्तै छ, न त स्थानीय सरकारको ध्यान पुगेको छ । यहाँ कार्यरत चिकित्सकको कुरै छाडौं उनीहरूलाई तलब बाहेक धेरै सोच्ने फुर्सद छैन’, स्थानीय चन्देश्वर मण्डलले भने ।

स्वास्थ चौकीमा औषधि अभावको सन्दर्भमा कतिपय जनप्रतिनिधीहरुले अनभिज्ञता प्रकट गरेका छन् भने कतिपयले कर्मचारीहरुले नटेरेको प्रतिकृया दिएका छन् । स्वास्थ्य संस्थासँग टाँसिएकै हँसपुर ९ को वडा कार्यालयमा वडा अध्यक्ष नरेश मण्डल दैनिकी बस्छन् तर उनलाई स्वास्थ चौकीमा औषधि छ की छैन डाक्टर आउँछ की आउँदैन खासै मतलब नराखेको एक स्थानीयले बताए ।

यसबारेमा नगरप्रमुख रामज्ञान मण्डलसँग प्रतिक्रिया लिँदा उनले कर्मचारीको कमजोरीले औषधि अभाव भएको हुनसक्ने बताए । उनले भने, ‘कर्मचारीहरुको समायोजन भइरहेको हुनाले कर्मचारी पुग्न ढिलो भएको होला । नगरभित्र हरेक महिनाको ५ गते स्वास्थ्य संयोजक लगायत स्वास्थ्य चौकीको इन्चार्जहरुको मिटिङ्ग बसेर कहाँ कति औषधि चाहिन्छ भनेर नगरपालिकामा पत्राचार गरिन्छ त्यसकै आधारमा औषधि उपलब्ध गराउदै आएका छौं, भर्खरै हामी जिल्ला जनस्वास्थ्य कार्यलयबाट औषधि मगाएर स्वास्थ चौकीमा पठाएका छौं । सोनिगमा स्वास्थ्य चौकीमा औषधि पुग्नुपर्ने हो तर त्यहाँका इन्चार्जले माग गर्न नआएकाले नपुगेको हुनसक्छ औषधि नभएको स्वास्थ्य चौकीमा दुई दिन भित्रमा औषधि पूर्ति गर्छौं ।’