सांसद यादवद्धारा एकैदिन ३ योजनाको शिलान्यास : 'कामचोरहरु तिलमिलाए'

न्यूज ब्यूरो, सिरहा । राजपा नेपालका अध्यक्षमण्डलका सदस्य एवं संघीय सांसद राजकिशोर यादवले पहिले झैं अब टिकाप्रथाको राजनीति गर्ने सपना कसैले नदेखे हुने बताएका छन् ।

सिरहा निर्वाचन क्षेत्र नम्बर ४ का प्रतिनिधिसभा सांसद यादवले बिहीबार आफ्नो निर्वाचन क्षेत्रमा विभिन्न योजनाको शिलान्यास तथा पार्टी प्रवेश कार्यक्रमलाई सम्बोधन गर्दै यस्तो बताएका हुन् । उनले अब ठूला नेताको झोला बोकेर नेता बन्ने सपना कसैले नदेखे हुने जिकिर गरे ।

नेता यादवले जनता विस्तारै सचेत हुँदै गएको भन्दै आश्वास मात्र बाँडेर र जनतालाई छलेर राजनीति गर्दै आएकाहरुको अब जनताले नै पतन गर्ने बताए । जनताको बीचमा आएर जनतालाई हरेक दृष्टिकोणबाट खुशी पार्नसक्ने नेताको मात्रै अब गुञ्जायस रहेको उनले तर्क गरे ।

प्रतिनिधिसभा सदस्यमा निर्वाचित भएदेखि नै विकास निर्माणका कामलाई प्राथमिकतामा राखेर अघि बढेका नेता यादवले आफूले गरेको काम देखेर पतन हुने डरले काम नगर्नेहरु त्रसित बनेको बताए । उनले आफ्नो लोकप्रियता देखेर जनताको काम गर्न नचाहनेहरुले विभिन्न भ्रम सिर्जना गर्न खोजेको आरोपसमेत लगाए ।

नेता यादवले भने, ‘म पुस्तौदेखि पछि परेको समाजलाई अगाडि ल्याउन चाहेको छु, समृद्ध समाज बनाउन चाहेको छु । तर, जनताको काम गर्न नचाहने र नसक्नेहरुले सबै मान्छे राजकिशोरकै भइहाल्छ कि भनेर विभिन्न अनर्गल प्रचारमा लागेका छन्, उनीहरु आफ्नो पतन हुने डरले जनता भड्काउन राजपा फुट्दैछ भनेर हल्लासमेत चलाएका छन् ।’ राजपा एक रहिरहने र फुट्नेबारे कसैले नसोचे पनि हुने बताउँदै उनले राजपा जनतालाई विकल्प दिन बैकल्पिक शक्ति निर्माणको अभियानमा लागेको स्पष्ट पारे ।

विकसित एवं समृद्ध समाज र देश निर्माणको अभियानमा जनताले राजपालाई बुझ्दै गएकोप्रति कृतज्ञता जनाउँदै उनले सबैलाई साथ दिन आह्वान गरे । आफ्नो निर्वाचन क्षेत्रका गाउँटोल अनुगमनमा सक्रियता बढाएका नेता यादवले विकास निर्माण तथा कुनै किसिमको आवश्यक सहयोगबारे आफूसँग खुलेर माग्न आग्रह गरे । उनले आफ्नो पार्टी र आफूले विकासको मामिलामा कुनै कसर बाँकी नराख्ने प्रतिवद्धता जनाए ।

बजेटको लागि चिन्ता नलिन आग्रह गर्दै उनले विकास निर्माणको काममा सक्रियता साथ एक ढिक्का भएर लाग्न सबैलाई निर्देशन दिए । सांसद यादवले बिहीबार आफ्नो संसदीय विकास कोषको लगानीमा मिर्चैया नगरपालिका–११ स्थित सोनी गदहबामा सामुदायिक भवनको शिलान्यास गरेका छन् भने कर्जन्हा नगरपालिका–४ भुल्कियामा आठसय मिटर सडक कालोपत्रे र वडा ५ बडहरा मिर्चैयामा सामुदायिक भवनको शिलान्यास गरेका छन् ।

मिर्चैया–११ सोनी गदहबामा आयोजित कार्यक्रमबाट तत्कालिन संघीय समाजवादी फोरम नेपालबाट स्थानीय निर्वाचनमा निर्वाचित एक वडासदस्यसहित विभिन्न पार्टी परित्याग सयौंको संख्यामा नेता कार्यकर्ता राजपामा प्रवेशसमेत गरेका छन् । नव प्रवेशीहरुलाई नेता यादवले विधिवत् रुपमा पार्टी प्रवेश गराउँदै स्वागत गरे ।