कार्तिक पूर्णिमा : कमलाको 'रामघाट' मा विशेष मेला, पूर्वतयारी अन्तिम चरणमा

न्यूज ब्यूरो, जनकपुरधाम । प्रत्येक वर्ष कार्तिक पूर्णिमाको दिन कमला नदीमा लाग्ने मेला यसपाली विशेष हुने भएको छ ।

धनुषा र सिरहा जिल्लाको सीमाको रुपमा रहेको ऐतिहासिक कमला नदीमा यसपाली कमला बचाउ अभियानको वार्षिकोत्सव सहित भव्य रुपमा मेला लाग्ने भएको छ । सिरहाको चिकना घाट सामुन्ने रहेको धनुषाको रामघाटमा आयोजना हुन लागिएको कमला बचाउ अभियानको प्रथम वार्षिकोत्सवको अवसरमा देशविदेशका दिग्गज जलपुरुष, जल अभियानीहरु आउने भएका छन् । धनुषाको शहिदनगर नगरपालिकाको व्यवस्थापन तथा कमला बचाउ अभियानको आयोजनामा कमला नदीमा कार्तिक पूर्णिमा अर्थात कार्तिक २६ गते भव्य कार्यक्रमको आयोजना गरिएको हो ।

कमला बचाउ अभियानका अगुवा एवम् सँयोजक विक्रम यादवको पहलमा मनाउन लागिएको प्रथम वार्षिकोत्सवमा विभिन्न साँस्कृतिक कार्यक्रम सहित भारत, बँगलादेश लगायत अन्य देशबाट आउने अतिथिहरुलाई स्वागत सत्कार एवम् सुरक्षाको लागि पूर्वतयारी बैठक समेत सम्पन्न गरिएको हो । शुक्रबार सिरहामा बसेको बैठकबाट मेला व्यवस्थापन, अतिथि व्यवस्थापन, श्रद्धालु व्यवस्थापन, सुरक्षा व्यवस्थाको बारेमा गहन छलफल गरिएको हो ।

सिरहा नगरपालिकाका मेयर अशेश्वर प्रसाद यादवको अध्यक्षतामा भएको कार्यक्रममा सिरहाका प्रमुख जिल्ला अधिकारी (सिडिओ) गोपाल अधिकारी र धनुषाका प्रमुख जिल्ला अधिकारी(सिडिओ) प्रदीपराज कणेल सहितको प्रशासनीक निकायका प्रमुखहरुसँग अभियानीहरुको अन्तरक्रिया सम्पन्न भएको छ । यसका साथै धनुषाका प्रहरी उपरीक्षक शेखर खनाल,सिरहाका प्रहरी नायब उपरीक्षक अपिलराज बोहरा, धनुषाका सशस्त्र प्रहरी उपरीक्षक राजेश उप्रेती ,सिरहाका सशस्त्र प्रहरी उपरीक्षक प्रबिण कणेलको विशेष उपस्थितिमा आगामी कार्तिक २६ गते सुरक्षा व्यवस्थापनको लागि दोहोरो छलफल गरिएको हो ।

धनुषाको शहिदनगर नगरपालिका र सबैला नगरपालिकाको सीमामै रहेको कमलाको रामघाटमा लाग्ने उक्त भव्य कार्तिक पूर्णिमा मेलाको लागि व्यवस्थापनको जिम्मेवारी सम्हालेका मेयर उदय कुमार बरबरिया यादवले कमला नदी छेउको दुवै तर्फका नगर प्रमुख, उपप्रमुखहरुले गम्भिरताका साथ लिएर विदेशी अतिथिहरुलाई स्वागत सत्कार गर्नुपर्ने धारणा राखेका थिए । पर्यावरण बचाउको उत्तम विकल्पको रुपमा रहेको कमला बचाउ अभियानलाई निरन्तरता दिनको लागि राजनीति हिसाबले नभई अभियानीको हिसाबले सबैलाई सहयोग गर्न अपिल गर्दे कार्तिक २६ गते सबैले आ-आफ्नो तवरबाट सहयोगको अपेक्षा जाहेर गरे ।

सो कार्यक्रममा कमला बचाउ अभियानका संयोजक बिक्रम यादव, सिरहा कर्जन्हा नगरपालिकाका मेयर गंगा पासवान, बिष्णुपुर गाउँपालिकाका अध्यक्ष जागेश्वर यादव, जनकनन्दनी गाउँपालिकाकी उपप्रमुख भारती कार्की सहित कमला छेउछाउका विभिन्न नगरप्रमुख र प्रतिनीधिहरुको सहभागिता रहेको थियो । कार्तिक पूर्णिमामा कमला स्नानको लागि रामघाटमा आउने श्रद्धालुको लागि विशेष व्यवस्था सहित भोजनको समेत व्यवस्था गरिने जनाइएको छ ।