पूर्व मावि विद्यार्थी समाजद्धारा देउसी भैलो, गाउँ नै रोमाञ्चित

न्यूज ब्यूरो, धनुषा । धनुषाको धनुषाधाम नगरपालिका–९ मा अवस्थित मावि धारापानी भिमान मुलाबारीका पूर्व विद्यार्थीहरुले देउँसे भैलोबाट संकलन भएको रकमबाट विद्यालयमा साईकल पार्क निर्माण गरेका छन् ।

हिन्दुहरुको महान पर्व शुभ दिपावलीको चौथोदिन खेलिने देउँसी भैलोलाई जीवित राख्न उनीहरु नगरका विशिष्ट व्यक्तित्वहरुको घरमा गएर देउँसी खेलेका हुन् । विद्यालयका पूर्व विद्यार्थीहरुले देउँसीको क्रममा नगरका मेयर, उपमेयर, वडाध्यक्ष लगायत सम्पूर्ण जनप्रतिनिधि र विशिष्ट व्यक्तित्वहरुबाट संकलन गरेको रकमबाट विद्यार्थीहरुको सहजताको लागि पार्क बनाइदिएका हुन् ।

देउँसीबाट संकलित रकमसहित बाहिरका दाताहरुको समेत सहयोगले पार्क निर्माण गरिएको विद्यालयका पूर्व विद्यार्थी जगदीश महतोले जानकारी दिए । पूर्व मावि विद्यार्थी समाजको आयोजनामा भएको देउँसी कार्यक्रममा नेपाली समुदायको कला संस्कृतिलाई बरकरार राख्न विभिन्न देउँसी तथा पौराणिक गीतमा ठुम्का लगाएका थिए ।

देउँसीमा विद्यार्थीदेखि शिक्षकसम्मले सौहार्दपूर्ण तरिकाले सबैलाई मन्त्रमुग्ध बनाए ।