प्लाष्टिको डोरीले घाँटी कसेर श्रीमानको हत्या !

न्यूज ब्यूरो, रौतहट । आफ्नै श्रीमानको हत्या गर्ने रौतहटकी एक महिलालाई रौतहट प्रहरीले पक्राउ गरेको छ। जिल्लाको गौर नगरपालिका - ५ कोइरीटोल बस्ने जरिना खातुनलाइ श्रीमान हत्या गरेको आरोपमा बिहीबार रौतहट प्रहरीले पक्राउ गरेको हो।

श्रीमती जरिनाले गत कार्तिक ४ गते श्रीमान ३५ वर्षीय इस्लाम अंसारीको हत्या गरेको अनुसन्धानमा खुलेको जिल्ला प्रहरी कार्यालय रौतहटका प्रहरी नायव उपरीक्षक नबिन कार्कीले जानकारी दिएका छन्। अन्सारीले अत्याधिक मादक पदार्थ सेवन गरी सुत्ने खाटबाट लडी घाइते भएको र जिल्ला अस्पताल गौर उपचारको लागि लैजाने क्रममा बाटोमा नै मृत्यु भएको भन्ने सूचनाको आधारमा शंका लागेर प्रहरीले अनुसन्धान गरेको थियो।

अनुसन्धान टोलीले घटनास्थलरलाश जाँच मुचुल्का समेतको कार्य सम्पन्न गर्दा उक्त मृतक लाश शंकास्पद देखिएकोले सो घटनाको थप अनुसन्धान गर्ने क्रममा निज मृतक इस्लाम अन्सारी र निजको श्रीमतीको प्राय घरायसी झगडा पर्ने गरेको र राति ११ बजेको श्रीमान श्रीमतीको वादविवाद भएकोमा मृतक इस्लाम अन्सारीको श्रीमती जरिना खातुनले आवेशमा आई प्लाष्टिकको डोरीले घाँटीमा कसी कर्तव्य गरी मारेको र खुल्न आएको प्रहरीको अनुसन्धान छ।

जरिनाले घटना लुकाउनको निमित्त गाउँ घर छर छिमेकमा श्रीमानले मादक पदार्थ सेवन गरी लडेको कारण अस्पताल लैजान हार गुहार गरेको खुल्न आएको समेत प्रहरीले जनाएको छ। अभियुक्त जरिना खातुनलाई ज्यानसम्बन्धी कसुरअन्तर्गत मुद्दा दर्ता गरी थप अनुसन्धान कार्य भइरहेको प्रहरी नायव उपरीक्षक कार्कीले जानकारी दिए।