अब जनकपुरमा 'फ्रि' मा कपडा लिनुहोस्

न्यूज ब्यूरो, जनकपुरधाम । समाजसेवीहरुको गढ मानिएको प्रदेश नं. २ को अस्थायी राजधानी जनकपुरधाममा निःशुल्क (फ्रि) कपडा भण्डार खोलिएको छ ।

नेपाली काँग्रेस निकट नेपाल तरूण दलको ६६ औं स्थापना दिवसको अवसरमा विहिबार जनकपुरमा कपडा बैंकको स्थापना गरिएको हो । गरिब, असहायहरुको लागि जाडोमा हुने समस्या र पीडालाई मध्यनजर गर्दै दलको जिल्ला कार्य समितिद्धारा निःशुल्क कपडा बैंकको स्थापना गरिएको हो । स्थापना गरिएको कपडा बैंकबाट जसलाई कपडाको आवश्यकता हुन्छ उनले कपडा फ्रि मा लिन सकिने तथा कोही सँग पुरानो वा नयाँ कपडा छ भने त्यसमा दान पनि गर्न सकिने छ ।

यसअघि पनि जनकपुरमा निःशूल्क कपडा बैंकको स्थापना गरिसकेको छ भने हजारौ व्यक्ति लाभान्वित बनेको छ । जनकपुरमा अब दुई वटा निःशुल्क कपडाको बैंक भएपनि प्रचार प्रसार र जानकारीको अभावमा कपडा बैंकसम्मको पहुँचलाई निरुत्साहित गरिएको देखिएको छ । गरिब, असहायमा शिक्षाको कमीले गर्दा पनि उनीहरुलाई कपडा बैंक जनकपुरमा छ र निःशुल्क पाईन्छ भने चेतना र जानकारीको अभावमा पहुँच कायम गर्न नसकेको अवस्था देखिएको छ ।

तरुण दलका उपसभापति राकेश विक्रम साहको अगुवाईमा गरिएको एक समारोहबीच नेपाली काँग्रेसका प्रदेश साँसद राम सरोज यादवको प्रमुख आतिथ्यमा उक्त कपडा भण्डारको उदघाटन गरिएको हो । दिपावली तथा छठ पर्वको शुभकामना आदान प्रदान समेत रहेको सो कार्यक्रममा नेपाल पत्रकार महासंघका केन्द्रिय सदस्य शैलेन्द्र झा,नेपाल प्रेस युनियन धनुषा अध्यक्ष राजन सिंह, महिला नेतृ अनिता श्रीवास्तब, निलम कर्ण,मिनु झा, शिवजी रायसहितका व्यतिmहरुको उपस्थिति रहेको थियो ।

कार्यक्रममा सहयोगी तीन जना लाई सम्मान गरिएको छ भने युनियन प्रेसका संचालक प्रमोद चौधरीले गरिब निमुखा लाई जाडोमा कम्बल वितरण गर्ने सुझाव दिदै सो कार्य संचालनका लागि पाँच हजार नगद समेत प्रदान गरेका छन । कपडा बैंकको स्थापनापछि जनकपुरका युवाहरुले यसबारे जनचेतना र जानकारी फैलाउन सके जरुरतमन्द व्यक्तिले त्यसको फाईदा उठाउन सकिने छ ।