युवा प्रशिक्षित नभएसम्म समाज र देश विकास हुँदैन : मन्त्री यादव

न्यूज ब्यूरो, सिरहा । प्रदेश २ का आर्थिक मामिला तथा योजनामन्त्री बिजय कुमार यादवले युवा प्रशिक्षित नभएसम्म समाज विकास नहुने बताएका छन् ।

सिरहा युवा सञ्जाल (एसवाईएन) को आयोजनामा भएको दुईदिने उद्घोषण तथा व्यक्तित्व विकास तालिमको समापन समारोहलाई सम्बोधन गर्दै मन्त्री यादवले यस्तो बताएका हुन् । समाजिक रुपान्तरणका लागि युवा अगाडि आउनुपर्ने उनले बताए ।

मन्त्री यादवले देशको समाजिक समस्यादेखि लिएर आर्थिक लगायतका सम्पूर्ण समस्यालाई परिवर्तन गर्ने दायित्व युवाको काँधमा नआएसम्म देशको समृद्धि असम्भव रहेको जिकिर गरे । उनले देश विकास र समाज परिवर्तनको निम्ति युवामा चाँसो नजागे देशको अवस्था झन खस्किदै जाने भन्दै युवालाई यसप्रति सचेत हुन आग्रह गरे ।

राजनीतिक दलको कार्यक्रम अथवा नेताको कार्यक्रममा लाम लाग्ने र यस्ता कार्यक्रमप्रति अझ युवाहरु चाँसो नराख्ने गरेकोप्रति उनले दुःखसमेत प्रकट गरे । गलत राजनीतिक सोच र संस्कारको विकासले यस्तो अवस्था आएको भन्दै उनले यसलाई परास्त गर्न पनि युवाकै खाँचो भएको औल्याए ।

सिरहा जिल्लाका युवाहरुको साझा संगठन सिरहा युवा सञ्जालले समाजको हित र समाजिक रुपान्तरणको लागि गर्दै आएका कार्य र प्रयासलाई मन्त्री यादवले प्रशंसासमेत गरे । उनले सञ्जाललाई सिरहामा मात्रै सिमित नराखि प्रदेशभरमै विस्तार गर्न आग्रह गरे । सञ्जाललाई चाहिने हरेक प्रकारको सहयोग गर्न प्रदेश सरकार पछि नहट्ने उनले प्रतिवद्धतासमेत जनाए ।

मंगलबारदेखि सुरु भएको दुईदिने प्रशिक्षण तालिम आज (बुधबार) समापन भएको छ । प्रशिक्षण कार्यक्रममा सिरहाका विभिन्न स्थानबाट सयौंको संख्यामा युवा तथा विद्यार्थीहरु सरिक भएका थिए ।