समाजिक जहरिला तत्वलाई जरैदेखि उखेल्छौं : इन्सपेक्टर दाहाल

न्यूज ब्यूरो, महेन्द्रनगर । समाजको अपराधिक क्रियाकलापलाई बढाबा दिने खालको तत्वको रुपमा रहेको मदिराजन्य पदार्थहरुलाई जरैदेखि उखेल्ने ईलाका प्रहरी कार्यालय महेन्द्रनगरका इन्सपेक्टर अमिर दाहालले बताएका छन् ।

धनुषाको क्षिरेश्वरनाथ नगरपालिका वडा नं. ५ महेन्द्रनगर स्थित रहेको ईलाका प्रहरी कार्यलय महेन्द्रनगरका इन्चार्ज समेत रहेको प्रहरी निरक्षक दाहालको सक्रियतामा ईलाका भित्रको विभिन्न ठाउँमा छापा हान्दै अवैद्य मदिरा नियन्त्रण गरी नष्ट गर्ने कार्यक्रम जारी राखिएको छ । उनकै नेतृत्वमा विभिन्न समयमा खटि गएको टोलीले चेकजाँच गर्ने क्रममा पक्राउ बरामद गरिएको करिब ६ सय लिटर अवैद्य मदिरा नष्ट पारेका छन् ।

अवैध मदिराका कारण विभिन्न समयमा अपराधिक क्रियाकलापलाई प्रश्रय मिलेको भन्दै यस्ता अपराधिक क्रियाकलापलाई जरैदेखि उखेल्न आफूहरु प्रयासमा लागेको बताए । उनले भने, हामी कडा रुपमा निगारानी बढाएका छौं, हाम्रो ईलाकाभित्र यस्ता प्रकारको समाजिक अराजक तत्वखाले गतिविधिलाई नियन्त्रण गर्न हामी कुनै कसर बाँकी राख्दैनौ । समुदाय प्रहरी साँझेदारी देशव्यापी कार्यक्रम अन्तर्गत प्रहरीसँग समाजको सहकार्य अपरिहार्य रहेको छ र यसमा यहाँका समाजले पनि हामीलाई सघाउने भन्ने आसा छ ।

बरामद गरिएको उक्त परिमाणको अवैद्य मदिरा महेन्द्रनगर स्थित रहेको एभेरेष्ट पेपर मिल नजिकै रहेको खोलामा बगाइएको हो । स्थानीय बुद्धिजीवी, पत्रकार, युवा, अधिकारकर्मीहरुाके रोहबरमा मदिरा नष्ट गरिएको हो ।