धनुषाको कमला नगरपालिकामा 'दिपावली'

न्यूज ब्यूरो, जनकपुरधाम । पूर्वी धनुषाको कमला नगरपालिकामा संविधान दिवसको अवसर पारेर दिपावली मनाइएको छ ।

गत वि.सं. २०७२ साल असोज ३ गते आजैका दिन नेपालको संविधान २०७२ जारी भएको विशेष अवसर पारेर संविधान दिवस दिपावली सहित रक्तदान कार्यक्रम गरी मनाइएको छ । दिउँसो कमला नगरपालिकाका कर्मचारी, जनप्रतिनीधि, स्थानीय, शिक्षकहरुको सहभागीतामा रक्तदान कार्यक्रम गरिएको नगरपालिकाका भेटेनरी शाखाका रविन्द्र यादवले जानकारी दिए ।

नेपालको संविधान २०७२ लाई टेकेर गठन भएको स्थानीय तहमा कार्यरत कर्मचारीहरुले सरकारले जारी गरेको उर्दीलाई मान्दै उनीहरुले दिपावली मनाएका हुन् । विभिन्न राजनीतिक दल आवद्ध जनप्रतिनीधिहरुको सहभागीतामा रक्तदान कार्यक्रम गरिएको जनाइएको छ । सो कार्यक्रममा नगरपालिकाका मेयर राम उदगार गोईत, उपमेयर शिला देवी मण्डल लगायत अन्य कर्मचारी तथा जनप्रतिनीधिहरुले रक्तदान गरेका थिए । रक्तदान जीवनदान मूल नाराका साथ नेपाल रेडक्रम सोसाईटी धनुषा शाखाको सहयोगमा रक्तदान कार्यक्रम गरिएको हो ।

रेडक्रसको ब्लडबैंकमा रक्त अभाव भएको तथा रक्तदानले कसैको जीवन बच्न सक्ने उदेश्यका साथ कर्मचारीहरु सहित जनप्रतिनीधिहरुले रक्तदान कार्यक्रम गरेका थिए । सो कार्यक्रममा स्थानीय सहित ७५ जनाले रक्तदान गरेको जानकारी गराइएको छ । यसका साथै साँझ संविधान दिवसको अवसरमा दिपावली समेत गरिएको हो । नेपालको संविधान २०७२ लाई मान्दै उनीहरुले संविधान दिवसमा दिपावली गरेको जनाइएको छ ।

कमला नगरपालिकाको कार्यालयमा झिलीमिली पारी दीप प्रज्वलन गर्दै दिपावली मनाइएको हो । कमला नगरपालिकाको विभिन्न वडामा नेपाली काँग्रेस, नेकपा र समाजवादी पार्टी सम्वद्ध जनप्रतिनीधिहरु चयन भएका छन् ।