तीजमा नुहाउन जाँदा नदीमा डुबेकी ३ महिलाको शव भेटियो

न्यूज ब्यूरो, कपिलबस्तु । कपिलवस्तुमा तीजमा नदीमा नुहाउन जाँदा डुबेर बेपत्ता भएकी ३ महिलाहरुको शव फेला परेको छ ।

सोमबार बिहान नुहाउन गएकी शुद्दोधन गाउँपालिका वडा नं. ६ का १५ वर्षीय तारा कोहार, ८ वर्षीय खुश्बु रैदास र २५ वर्षीय तारामति कोहारको मंगलबार शव फेला परेको हो ।

१५ वर्षीय तारा कोहारको शव डुबेको स्थान नजिकै नदी किनारमा आज बिहान फेला परेको छ । ८ वर्षीय खुब्बु रैदास र २५ वर्षीय तारामति कोहारको शब आज दिउँसो डुबेको स्थान सन्तघाटबाट करिब ५ सय मीटर दक्षिण मलखोरियामा नदीमा तैरिएको अवस्थामा फेला परेको प्रहरी नायब उपरीक्षक सुनिलकुमार मल्लले जानकारी दिए ।

उनीहरु तीजको अवसरमा गाउँ नजिकैको वेथी नदीको सन्तघाटमा स्नान गर्न गएका थिए । नदीमा स्नान गर्ने क्रममा डुबेका ५ जना मध्ये अन्य २ जना महिलालाई स्थानीय युवाहरुले तानेर निकालेको बाँकी ३ जना नदीमै डुबेको स्थानीयले बताए ।