नक्कली ऋणको तमसुक बनाएर गरिब लुट्ने श्याम परदेशी समातिए !

न्यूज ब्यूरो, सर्लाही । सर्लाहीमा पैसा चर्को ब्याजमा लगाएर तमसुक बनाई ऋणीहरुलाई चरम शोषण गर्ने साहु श्याम कृष्ण साह परदेशीलाई प्रहरीले पक्राउ गरेको छ ।

अनुसन्धानका लागि प्रहरीले उनको आफ्नै घर सर्लाहीको मलंगवा नगरपालिका १० स्थित घर नजिकैबाट पक्राउ गरेको हो । सर्वसाधारण गरीबहरुको विवशताको फाइदा उठाई चर्को ब्याजमा ऋण दिने र ७ वटासम्म तमसुक बनाई चरम शोषण गर्ने गरेको समाचार विभिन्न मिडियामा आईतावार सार्वजनिक भएको थियो ।

साहु परदेशीबाट प्रताडित ऋणी महिलाहरुको एक समुह काठमाडौं पुगेर सम्बन्धीत निकायसंग गुरहा माग्न पुगेपछि यस्तो रहस्य सार्वजनिक भएको हो । हालाकी, यो विषय एकवर्षअघि पनि सार्वजनिक भएको थियो । तर, पीडितहरुले न्याय पाएनन् ।

साहू परदेशीले २ सय ९९ जनालाई ऋण दिएर मोटो रकमको तमसुक बनाएर शोषण गर्दै आएका छन् । प्रहरीले उनलाई नियन्त्रणमा लिएर अनुसन्धान पक्रिया अगाडि बढाएको सर्लाही प्रहरीले जनाएको छ ।