जनकपुरमा घुमुवा प्रहरीको आतंक : व्यवसायीले गुहारे मन्त्री

न्यूज ब्यूरो, जनकपुरधाम । प्रदेश २ को अस्थायी राजधानी जनकपुरधामका व्यवसायीहरूले सादा पोशाकका घुमुवा प्रहरीबाट अजित बनेर प्रदेश २ सरकारका अन्तरिक मामिला तथा कानुनमन्त्री ज्ञानेन्द्र यादवलाई गुहार लगाएका छन् ।

घुमुवा प्रहरीले आतङ्क मच्चाएको आरोप लगाउँदै आजित भएर व्यवसाय नै बन्द गर्ने अवस्था उत्पन्न भएको भन्दै व्यवसायीहरुले मन्त्रीलाई ज्ञापनपत्र बुझाएका हुन् । ऐन कानुनविपरीत प्रहरीले बिना कुनै आधार व्यापारिक प्रतिष्ठानहरूमा पुगेर अनुगमनको नाउँमा तर्साउने र धम्काउने कार्य गरिरहेको धनुषा चेम्बर्स अफ कमर्सले आरोप लगाएको छ ।

बिना कारण पसलमा छिरेर सादा पोशाकका प्रहरीले धम्क्याउने गरेका कारण व्यापार व्यवसाय बन्द गर्ने अवस्था भइसकेको कमर्सका अध्यक्ष विजयकुमार साहले बताए । घुमुवा प्रहरीको यस्तो क्रियाकलाप रोक्न आफूहरुले प्रदेश २ का आन्तरिक मामिला तथा कानुन मन्त्रीलाई भेटेर ज्ञापन पत्रमार्फत ध्यानाकर्षण गराएको अध्यक्ष साहले बताए ।

जनकपुर प्रदेशको राजधानी भएपछि आफूहरु उत्साहित भएपनि पछिल्लो समय प्रहरी प्रशासन र भन्सारबाट अनुगमन तथा निरीक्षणको नाममा व्यापारीहरूलाई तर्साउने कार्य भइरहेको उनीहरुको भनाई छ ।

प्रहरीबाट भइरहेको पैसा माग्ने, व्यवसायीलाई तर्साउनेजस्ता कार्यहरू बन्द गर्न माग गर्दै कमर्सले यस्ता कार्यहरू तत्काल बन्द नभए आफूहरु पसलमा ताल्चा लगाई प्रदेश सरकारलाई साचो बुझाउन बाध्य हुने व्यवसायीहरुले चेतावनी समेत दिएका छन् ।