जनकपुर : मोटरसाईकल सहित युवक खाल्डोमा, टाउको फुटेर मृत्यू  !

न्यूज ब्यूरो, जनकपुरधाम । आइतबार राती करिब ९ बजे धनुषाको कनकपट्टिमा एक युवकको मोटरसाईकल दुर्घटनामा परी मृत्यू भएको छ ।

जनकपुरधाम उपमहानगरपालिका वडा नं. १७ कनकपट्टि स्थित बर्षा र बाढीले बनाएको खाल्डोमा खसेर एक युवकको मृत्यू भएको जिल्ला प्रहरी कार्यालय धनुषाले जनाएको छ । जनकपुरबाट कनकपट्टि जाने बाटोमा रहेको उक्त खाल्डोमा गएराती ९ बजेतर्फ मोटरसाईकल सहित खसेका थिए । गम्भिर घाईते भएका उनलाई उपचारको लागि जनकपुर अञ्चल अस्पताल लैजाँदै गर्दा बाटोमै मृत्यू भएको प्रहरीले जनाएको छ ।

प्रहरीका अनुसार मृत्यू हुनेमा धनुषाको शहिदनगर नगरपालिका वडा नं. ४ ननुपट्टि बस्ने अन्दाजी बर्ष ३० का सुजित पासवान रहेको छ । जनकपुरबाट घरतर्फ जाँदै गरेको अवस्थामा कनकपट्किो उक्त खाल्डोमा उनले मोटरसाईकल पार गर्दै गर्दा दुर्घटनामा परेको बताइएको छ । ज १० प ३७२० नम्बरको मोटरसाईकल सहित पासवान खाल्डोमा खसेका थिए । उनको टाउको फाटेको थियो जसको कारण अवस्था अत्यन्तै जटिल भएर केही बेरमै मृत्यू भएको प्रहरीले जनाएको छ ।

मृतक पासवानको शव जनकपुर अञ्चल अस्पतालमा पोष्टमार्टमको लागि अहिलेसम्म राखिएको प्रहरीले जनाएको छ । गत असारमा आएको भिषण बाढीका कारण सडक बगाएर बनाएको खाल्डो खतरनाक भएपनि स्थानीय सरकारले कुनै चासो नलिएकै कारण अप्रिय घटना भएको स्थानीय युवाहरुले आरोप लगाएका छन् ।