नगरकी छात्राहरुलाई मेयर पँजियारको साईकल उपहार

न्यूज ब्यूरो, जनकपुरधाम । धनुषाको रमदैया भवाडीकी छात्राहरुलाई विद्यालयसम्म सहज पहुँचको लागि साईकल वितरण गरिएको छ ।

धनुषाको क्षिरेशवरनाथ नगरपालिका वडा नं. १ रमदैया स्थित रहेको मावि रमदैया भवाडीको कक्षा ९ मा अध्ययनरत छात्राहरुलाई साईकल वितरण गरिएको हो। नगरपालिका अन्तर्गतका सामुदायिक विद्यालयहरुमा अध्ययनरत छात्राहरुको मनोवल र बालबिबाह अन्त्य गर्न क्षीरेश्वरनाथ नगरपालिकाका मेयर योगेन्द्र पजियारले उपहार स्वरुप साईकल वितरण गरेका छन् ।

पजियारले नगर भित्रका २ सय ५० छात्राहरुलाई साईकल वितरण गर्ने कार्यक्रम अनुसार बुधवार क्षीरेश्वरनाथ नगरपालिकाको वडा नं.१ रमदैया स्थित साइकल वितरण गरेका हुन् । नगरपालिकाले माघ २ गते नगरका सम्पूर्ण माध्यमिक विद्यालयमा अध्ययनरत कक्षा ९ का छात्राहरुलाई साईकल वितरण गरिने गरेको निर्णय अनुरुप साईकल वितरण गरिएको हो ।

छोराछोरीवीच समान व्यवहार नभएसम्म क्षिरेश्वरनाथ नगरपालिका विकासको कल्पना समेत गर्न सकिदैन । मेयर पँजियारले भने । बुधबार क्षिरेश्वरनाथ नगरपालिकाको रमदैया स्थित मा.वि. कुमरौल रमदैया भबाडीका छात्राहरुलाई साईकल वितरण गर्दै वडा नं १ का वडा अध्यक्ष लालबाबु यादवले हाल समाजमा कायम रहेको अनेकौ महिलाहिंसाको मुख्य जड विभेद रहेकोले यसको अन्त्य नभएसम्म प्रदेशमा समृद्धि हुन नसक्ने ठोकुवा गरे ।

नारा, अभियान र भाषणले केही नहुने बताउँदै वडाअध्यक्ष यादबले सवैको सहयोग लिएर काम गर्नुपर्ने आवश्यकतामाथि जोड दिए । सदियौदेखि कायम रहेको महिलाहिंसा न्युनिकरणका लागि प्रदेश सरकारले ल्याएको वेटी पढाउ, बेटी वचाउ अभियानले हदसम्म सहयोग गर्नेछु उनले भने ।

एक अर्को प्रसंगमा वडा अध्यक्ष यादबले संघीय सरकारले अस्थायी शिक्षकहरुलाई हटाएर अन्याय गरेकोले सरकारलाई यसतर्फ समयमै सोच्नका लागि आग्रह गर्दै बर्षौदेखि विद्यालयमा सेवा दिएका अस्थायी शिक्षकलाई हटाएर सरकारले करारको नाममा स्थानिय राजनितीक दलका नेतालाई कार्यकर्ता पाल्नका लागि अवसर दिएकोले यसलाई रोक्नुपर्ने धारणा जाहेर गरे ।

कार्यक्रममा क्षिरेश्वरनाथ नगरपालिका वडा नं २ का वडा अध्यक्ष श्याम यादव, कार्यपालिका सदस्य विरेन्द्र सिंह, राम ईश्वर यादव लगायतका वक्ताहरुले छोरी शिक्षाप्रति जोड दिएका थिए ।