बसपिट्टाका बाढी पीडितलाई धानुक सेवा समाजको राहत

न्यूज ब्यूरो, सिरहा । अविरल वर्षापछिको विनाशकारी बाढीले प्रभावित सिरहाका पीडित परिवारलाई वैदेशिक रोजगारमा रहेका नेपालीहरुद्धारा राहत प्रदान गरिएको छ ।

सिरहा–धुनषाको सिमामा पर्ने कमला नदीको बाढीले अत्ति प्रभावित सिरहा जिल्लाको बसपिट्टा, कत्कोल्बा र सारस्वर गाउँमा वैदेशिक रोजगारीमा रहेका नेपालीहरुको समाजिक संस्था धानुक सेवा समाज कत्तारले राहत वितरण गरेको हो । विनाशकारी बाढीले अस्तव्यस्त बनेका यी बस्तीका ३५ बढी घरपरिवारलाई राहत बाँडिएको छ ।

कमलाको छर्की भत्काएर गाउँ पसेको बाढीले अन्नपात समेत बर्बाद पारेपछि राहत पर्खिरहेका उनीहरुलाई राहत स्वरुप प्रति व्यक्ति १० केजी चामल, दाल, खाने तेल, म्याटर्स फोम, नुन, सलाई लगायतका राहत सामाग्री वितरण गरिएको संस्थाका अध्यक्ष सुरेश मण्डलले जानकारी दिए ।

अविरल वर्षापछि कमला नदीमा आएको बाढी बस्तीमा पस्दा गाउँमा वितण्डा मचाएको छ । राहत वितरण कार्यक्रमको प्रमुख अतिथिका रुपमा सहभागी समाजवादी पार्टीकी नेत्री शोभा मण्डलको हस्तबाट राहत वितरण गरिएको थियो । त्यस्तै, संस्थाका सदस्यहरु डोमि मण्डल, लक्षमण मण्डल, राजेन्द्र मण्डल, काशिन्द्र मण्डल, धनिकलाल मण्डल, रुपक कुमार मण्डल लगायत सिरहाका पत्रकार बद्री यादव, स्थानीय भद्रभलादमी लगायतको उल्लेख्य सहभागिता थियो ।