बाढी पीडितलाई वडाध्यक्ष र प्रहरीको 'खीर'

न्यूज ब्यूरो, जनकपुरधाम । बाढीबाट विस्थापित भएका बाढी पीडितहरुलाई साउनमा खीर भोजन गराइएको छ ।

साउन चढे लगत्तै खीर खाने प्रचलन रहेको भन्दै बाढीबाट विस्थापित भएका धनुषाधाम नगरपालिका वडा नं. ५ का बाढी पीडितहरुलाई वडाध्यक्ष ईन्द्र कुमार महतो र प्रहरी चौकी उमाप्रेमपुर नौयसबीघाका सई गोपाल श्रेष्ठद्धारा बाढी पीडितहरुलाई खीर भोजन गराइएको हो । यसअघि उनीहरुको लागि मेस सँचालन गर्दै आएकोमा बुधबार साउन चढेको भन्दै खीर भोजन गराइएको जनाइएको छ ।

न्यूज ब्यूरोका धनुषा प्रमुख विनय कुमार यादवको विशेष सक्रियतामा वडाध्यक्ष महतो र सई श्रेष्ठले त्यस वडाका बाढी पीडितहरुलाई नियमित रुपमा राहत प्रदान गर्दै आएका छन् । नेपाल प्रहरीको हैसियतले सई श्रेष्ठ उनीहरुलाई थप सुरक्षा समेत प्रदान गरेका छन् । आफनो घर छाडेर विद्यालयमा शरण लिएका विस्थापित परिवारलाई सुरक्षाको प्रत्याभूति प्रदान गर्दै आएका छन् ।

बाढी आए दिनदेखि नै वडाध्यक्ष महतो आफना वडाका जनतालाई राहत दिँदै आएका छन् भने मँगलबार धनुषाधाम ईलाका प्रहरी कार्यालयका प्रहरी नीरिक्षक राम कुमार यादवले समेत पीडितहरुलाई राहत दिँदै सुरक्षाको लागि चिन्ता नलिन आश्वासन समेत दिएका थिए । घरमा पानी जमेकोले जतिबेला पनि खस्न सक्ने भएको कारण उनीहरु गाई वस्तु लिएर आधारभूत विद्यालय नौसय विघामा शरण लिएका हुन् ।

यसका साथै, बाढी पीडितहरुलाई खीर भोजन गराउँदै वडाध्यक्ष महतोले नगरपालिकाबाट विस्थापित भएका परिवारलाई पुन स्थापित गराउन पहल गर्ने प्रतिवद्धता जनाए । उनले घर टहरा गुमाएका परिवारलाई नयाँ घर बनाउनको लागि प्रक्रिया अगाडी बढाइने जनाए । यसपालीको नयाँ बजेटमा उनीहरुको नयाँ घर बनाउनको लागि योजना ल्याउने जनाए ।