बाढीका २ मृतक परिवारलाई मिर्चैयाका मेयरद्धारा किरिया खर्च सहयोग, राहत वितरणको तयारी

न्यूज ब्यूरो, सिरहा । अविरल वर्षापछिको विनाशकारी बाढीमा परी ज्यान गुमाएका दुई मृतक परिवारलाई सिरहाको मिर्चैया नगरपालिकाका मेयर श्रवण यादवले किरिया खर्च बापत आर्थिक सहयोग गरेका छन् ।

निरन्तर रुपमा परेको पानी र त्यसपछि आएको बाढीमा परी ज्यान गुमाएकी मर्चैया–४ कुथनमाकी दुई बालिकाको परिवारलाई मेयर यादवले आर्थिक सहयोग गरेका हुन् ।

मृतक १२ वर्षीया रागिनी महतोको पिता बद्री महतो र १० वर्षीया प्रियंका साहको पिता संतोष साहलाई २० २० हजारको दरले किरिया खर्च स्वरुप आर्थिक सहयोग हस्तान्तरण गरिएको मेयर यादवले जानकरी दिए । उनीहरु दुबैको बाढीमा डुबेर मृत्यू भएको थियो ।

बाढीमा परी ज्यान गुमाएका तथा घाईते र अन्य पीडित परिवारलाई समेत सहयोग गर्ने मेयर यादवले प्रतिवद्धता जनाए । बाढी प्रभावित नगर क्षेत्रमा राहत वितरणको तयारी भइरहेको उनले जानकारी दिए ।

वर्षा र बाढीबाट प्रभावित नगरका सडक बाटा तथा प्रभावित अन्य कार्यहरु सूचारुको लागि काम भइरहेको पनि मेयर यादवले जनाए ।