कोशीमा निरन्तर खतरा बढ्दै, ५६ मध्ये ४१ फाटक खोलियो, पानीको बहाब कति ?

न्यूज ब्यूरो, सुनसरी । अबिरल बर्षाका कारण निरन्तर रुपमा पानीको बहाब बढने क्रम जारी रहेको छ ।

साँझ ६ बजेको मापन अनुसार सप्तकोशीको पानीको बहाब ३ लाख ३१ हजार २ सय २० क्यूसेक मापन गरिएको छ । साँझ कोशी ब्यारेज कन्ट्रोल रुमले दिएको जानकारी अनुसार साँझ ६ बजेसम्म ३ लाख बढी क्यूसेक पानीको बहाब मापन गरिएको हो भने बहाब अझ बढने क्रम जारी नै रहेको छ ।

कोशीमा पानीको बहाबमा जति जति बृद्धि हुँदै गएको छ त्यही अनुपातमा कोशी ब्यारेजको फाटक( ढोका) खोल्ने क्रम पनि जारी रहेको छ । साँझ सम्म ५६ मध्ये ४१ ढोका खोलिएको जनाइएको छ । पानीको बहाब उच्च भएको भन्दै सप्तरी सुनसरी जिल्लाको कोशी छेउका गाउँहरुमा खतरा बढे सँगै ४१ ढोका खोलिएको हो ।

कोशीव्यारेजका अनुसार पानीको बहाव अघिल्ला दिनको तुलनामा अत्यधिक बढी हो । सप्तकोशीमा पानीको बहाव बढेपछि स्थानीय प्रशासनले नदी तटीय क्षेत्रका बासिन्दालाई सतर्क रहन गत विहिबारदेखि नै आग्रह गरेको छ । बिहीबार,शुक्रबार र शनिबार देशभर भारी वर्षाको कारण साना तथा ठूला नदीहरुमा बाढीको उच्च भएको हो ।

२०६५ भदौ २ गते १ लाख ६८ प्रतिसेकेन्ड क्युसेक पानीको बहाव भएकाले सुनसरीको पश्चिम कुसाहामा पूर्वी तटबन्ध भत्काउँदै सप्तकोशीले सुनसरीका ४ वटा गाविस डुबाएको थियो । भारतको विहारमा पनि कोशीले उठीबास लगाएको थियो ।

विहिबार २२ वटा, शुक्रबार ३२ वटा तथा शनिबार ३३ वटा दिउँसोसम्म ढोका खोलिएको थियो भने साँझ ४१ वटा ढोका खोलिएको हो ।