महेन्द्रनगरमा सात दिने पत्रकारिता तालिम सम्पन्न

न्यूज ब्यूरो, धनुषा । धनुषाको क्षीरेश्वरनाथ नगरपालिकाको महेन्द्रनगरमा सोमवारदेखि सुरु भएको एक हप्ते पत्रकारिता तालिम आईतवार सम्पन्न भएको छ ।

क्षीरेश्वरनाथ नगरपालिकाको सहयोग र गौना संचार समुहको आयोजनामा गरिएको पत्रकारिता तालिम आईतवार सम्पन्न भएको हो ।

तालिमबाट यस क्षेत्रमा नयाँ सँचारकर्मीहरु थपिने र पत्रकारिताको विकास हुने नगर प्रमुख योगेन्द्र पजियारले विश्वास व्यक्त गरेका छन् । उनले संचार संस्था र संचारकर्मीहरुको लागि नगरपालिकाले यस्ता किसिमको सहयोग गरी क्षमता अभिवृद्धिमा योगदान पुर्याउने प्रतिबद्धता समेत व्यक्त गरे ।

स्थानिय स्तरमा विभिन्न रेडियो पत्र–पत्रिकाहरुलाई मध्यनजर गर्दै जनशक्तिको आवश्यकता बुझि गौना संचार समुहद्वारा सुरु गरिएको आधारभुत ७ दिने पत्रकारिता तालिममा सहभागीहरुलाई प्रमुख अतिथी पजियारबाट प्रमाणपत्र प्रदान गरिएको छ । नगरपालिकाको आर्थिक सहयोगमा संचालित ७ दिने अधारभुत पत्रकारीता तालिममा जम्मा ३५ जनाले सहभागिता जनाएका थिए ।

तालिममा प्रशिक्षकको रुपमा पहिलो दिन स्थानिय खवर दर्पणका सम्पादक अजय साह, दोस्रो दिन राजन सिंह, तेस्रो दिन नविन सिंह नेपाली र बाँकी दिन ए–वान मिडिया काठमाण्डौंबाट आएका भागिरथ पोखरेलद्धारा प्रशिक्षण दिइएको थियो ।

यस तालिममा ७ दिन सम्म प्रशिक्षण दिएका खवरदर्पणका सम्पादक अजय साह, पशिक्षक राजन सिंह र भागिरथ पोखरेललाई गौणा संचार समुहको तर्फबाट कदरपत्र दिइएको छ भने क्षिरेश्वरनाथ नगरपालिकाका नगर प्रमुख योगेन्द्र पजियारलाई दुधमती एफ.एम. १०४ मेगाहर्जका संचालक अनिल कुशवाहाद्धारा मायाको चिनो स्वरुप जानकी मन्दिरको चिनो प्रदान गरिएको छ ।

कार्यक्रममा सरसफाईको फोकल परसन विजय यादव लगायत, स्थानीय बुद्धिजीवी, समाजसेवी, नागरिक समाज लगायत अभिभावकहरुको उपस्थिती थियो ।