जनकपुरको रञ्जना हत्या काण्ड : दोषीलाई कारवाही गर्न दबाब

जनकपुरधाम, पुस ९ गते ।
जनकपुरमा गएको मंसिर ९ गते हत्या भएको रञ्जना शर्माका छिमेक एवं महिला अधिकारकर्मीहरुले हत्यारालाई कार्वाहीको माग गर्दै आईतवार जनकपुरमा प्रदर्शन गरेका छन् । उनीहरुले रञ्जनाको हत्यामा संलग्न सबै दोषीहरुलाई कानुनी दायरामा ल्याउनु पर्ने माग गर्दै व्यानर र प्लेकार्ड सहित जनकपुरमा प्रदर्शन गरेका हुन् ।

जनकपुर उपमहानगरपालिका २ जानकीनगरबाट निस्केको जुलुस जिल्ला प्रशासन कार्यालय हुँदै सरकारी वकिलको कार्यालय पुगेको थियो । महिलाहरुले हत्याराहरुलाई कार्वाहीको माग गर्दै उनीहरुले सरकारी वकिलको कार्यालय अगाडी धर्ना समेत दिएका छन् ।

प्रदर्शनमा सहभागि महिला र आफन्तहरुले प्रशासनले पीडकबाट पैसा खाएर दोषीहरुलाई निर्दोष ठहर गरि उन्मुक्ति दिन खोजेको आरोप लगाएका छन् । फरार अन्य दोषीहरुलाई पक्राउ नगरेको र पक्राउ परेका दोषीलाई पनि निर्दोष प्रमाणित गरेर छाड्ने मनसाय बनाएको मृतक रञ्जनाकी बुबा रामनारायण ठाकुरले दुखेसो पोख्नुभयो ।

गत मंसिर ९ गते जनकपुर उपमहानगरपालिका वडा नं। २ का आनन्दमोहन शर्माका २२ वर्षकी श्रीमती रञ्जना शर्माको रहस्यमय मृत्यु भएको अवस्थामा शब बरामद भएको थियो । छिमेकहरुले रञ्जनाको हत्या घरपरिवरले नै गरेको दावी गर्दै शव बरामद भएको दिन पनि आक्रोस पोखेका थिए ।

छिमेकीलाई आक्रोसितदेखेपछि प्रहरीले हतारमा रञ्जनाको शव पोष्टमार्टमका लागि जनकपुर अञ्चल अस्पताल पुर्याएका थिए । पोष्टमार्टम रिपोर्टमा रञ्जनाको घाँटी थिचेर मृत्यु भएको देखाएपछि उनको हत्या नै भएको पुष्टि भएको छ ।

घटना पश्चात रञ्जनाकी माइत पक्षले छोरीको हत्या भएको भन्दै रञ्जनाकी ससुरा देवनारायण ठाकुर, सासु सुमित्रादेवी ठाकुर, पति आनन्दमोहन शर्मा, जेठाजु अरविन्द शर्मा र उनका श्रीमती रिंकुको हत्यामा संलग्नता रहेको भन्दै उनीहरुको नाममा जिल्ला प्रहरी कार्यालय धनुषामा किटानी जाहेरी दर्ता गराएका थिए ।

किटानी जाहेरी दर्ता पश्चात प्रहरीले रञ्जनाकी ससुरा देवनारायण र सासु सुमित्रालाई पक्राउ गरि कार्वाही प्रक्रिया अघि बढाएको छ । तर किटानी जाहेरी परेका अन्य अभियुक्तहरुलाई भने प्रहरीले हालसम्म पक्राउ गरेको छैन ।

रञ्जनका पति आनन्दमोहन,जेठाजु अरविन्द र जेठानी रिंकु पोखरा बस्दै आएका छन् । तर छिमेकहरुका अनुसार रञ्जनाको हत्या भएको घटनाको रात उनीहरु पनि घर आएका थिए । घटना भएको रातिको साँझमा रञ्जनाका ससुरा देवनारायणले दुई किलो मासु र बियर ल्याएका थिए ।

उक्त रात दुवै छोरा र जेठी बुहारीसमेत रातिमा आएका थिए । पूर्व योजना तहत रातिमा रञ्जनाले नै पकाएको मासु सबै जनाले खाएर उनकै घाँटी थिचेर हत्या गरि राति नै फरार भएको छिमेकहरुको दावी छ । पहिलादेखि नै घरपरिवारले रञ्जनालाई विभिन्न बहानमा यातना दिँदै आएको छिमेकहरुको भनाई छ ।

छिमेक मञ्जु ठाकुरका अनुसार घरपरिवारले पटक पटक रञ्जनालाई यात्ना दिँदै आएका थिए । १८ लाख दाईजो लिएर आनन्दमोहन शर्माले लहानका रामनारायण ठाकुरका छोरी रञ्जनासंग २०७३ असार महिनामा समाजिक परम्परा अनुसार विहे गरेका थिए ।

विहे भएको केहि महिना पश्चात पति सासु,ससुरा र जेठाजु जेठानीले विभिन्न बहानामा रञ्जनालाई यातना दिँदै आएको दुखेसो छिमेकहरुले बताएका छन् । त्यस कारण रञ्जनाको हत्या परिवारकै सदस्यहरुले मिलेर गरेको छिमेकहरुको दावी छ ।

माईतपक्षका अनुसार पति आनन्दमोहन शर्मा गत दशैँमा रञ्जना माइत गएको बेला माईतमै पुगेर रञ्जनालाई कुटपीट समेत गरेका थिए । त्यसपछि पनि रञ्जना आफ्नै घरमा आएर जनकपुरमा नर्सिंग पढ्दै गरेकी थिइन् ।

र पनि पतिले पछिल्लो समय फोन गर्न छाडेका थिए । रञ्जनाले नै फोन गर्दा पनि नराम्रो संग पति आनन्दमोहन शर्मा बोल्दै आएको छिमेकहरुको कथन छ । घटनामा घरपरिवराका सबैको संलग्नता रहेको भन्दै माईत पक्ष र टोलबासीले कार्वाहीको माग गरेका छन् ।

#Todaypati